මෙල්බන් ගුවන්තොටුපොළ වෙත පැමිණීමට නියමිතව තිබූ සියලුම ගුවන්ගමන් තාවකාලිකව අත්හිටුවීමට පියවර ගැනීමත් සමඟ මගීන් දහස් ගණනක් දැඩි අපහසුතාවයට පත්ව තිබෙනවා.
Airservices Australia ආයතනය විසින් අද පස්වරුවේ මෙම නියෝගය නිකුත් කර තිබූ අතර, ඒ අනුව මෙල්බන් බලා පිටත්වීමට නියමිතව තිබූ අනෙකුත් ගුවන්තොටුපොළවල තිබූ සියලුම ගුවන්යානා ඒ ඒ ස්ථානයන්හිම නවත්වා තැබීමට පියවර ගැනුණා.
ගුවන් ගමනාගමන පාලක මැදිරියේ ඇතිවූ දැඩි තදබදය සහ පැවති අයහපත් කාලගුණික තත්ත්වය මීට හේතු වූ බවයි මෙල්බන් ගුවන්තොටුපොළ ප්රකාශකයෙකු සඳහන් කළේ.
FlightRadar24 සිතියම්වලින් දැක්වුණේ ගුවන්තොටුපොළට ඉහළින් ගුවන්යානා රැසක් ගුවනේ වටරවුම් ගසමින් පාවෙමින් තිබූ බවයි.
කෙසේ වෙතත් විනාඩි 20කට ආසන්න කාලයකට පසු මෙම අත්හිටුවීමේ තහනම ඉවත් කළද, ගුවන්ගමන් නැවත යථා තත්ත්වයට පත්වන තෙක් සියලුම ගුවන්ගමන් විනාඩි 20 සිට 40 දක්වා ප්රමාදයකට ලක්වන බවයි වාර්තා වන්නේ.
