මෙල්බන් පර්යේෂකයන් පිරිසක් මානසික සෞඛ්‍ය ගැටලු ඉක්මනින් හඳුනාගත හැකි AI තාක්ෂණයක් සංවර්ධනය කර තිබෙනවා.

මේ සඳහා ඔවුන් වසර දෙකක් පුරා Reddit සමාජ මාධ්‍යයේ පළවූ මානසික සෞඛ්‍යයට සම්බන්ධ සටහන් මිලියනයක් විශ්ලේෂණය කළ බවයි පවසන්නේ.

මෙල්බන්හි Victoria University පර්යේෂක Saima Rani සහ Associate Professor Khandakar Ahmed, University of Melbourne හි මනෝ වෛද්‍ය විශේෂඥ Dr Manjula O’Connor සමඟ එක්ව මෙම පර්යේෂණය සිදුකර තිබෙනවා.

Victoria University පර්යේෂකයන් විසින් PaLM 2 සහ AutoML නමැති AI මාදිලි දෙක මේ සඳහා පුහුණු කරනු ලැබුවා.

විශේෂඥ වෛද්‍යවරියක වන Manjula O’Connor විසින් සටහන් 800ක් පරීක්ෂා කර වර්ගීකරණය කිරීමෙන් පසු එම තොරතුරු AI මාදිලිවලට ලබාදී තිබෙනවා.

PaLM 2 මාදිලිය මිනිස් විනිශ්චය සමඟ සියයට 80ක් ගැළපුණු අතර AutoML මාදිලිය සියයට 68ක ගැළපීමක් පෙන්නුම් කළා.

මානසික පීඩනයට හේතුවන කම්පන, ආතතිය, ළමා කාලයේ අත්දැකීම් සහ මත්ද්‍රව්‍ය භාවිතය වැනි කරුණු හඳුනාගැනීමට මෙම තාක්ෂණය උපකාරී විය හැකියි.

ඉදිරියේදී රෝගීන් ඉක්මනින් පරීක්ෂා කිරීම සහ ඔවුන්ට වඩාත් ගැළපෙන ප්‍රතිකාර ලබාදීම සඳහා මෙය යොදාගත හැකි බවයි පර්යේෂකයන් පවසන්නේ.