වැඩිහිටියන් සඳහා සෞඛ්‍ය සහ වැඩිහිටි සත්කාර පහසුකම් අතින් ඔස්ට්‍රේලියාවේ හොඳම ප්‍රාන්තය New South Wales බව නව පර්යේෂණ ශ්‍රේණිගත කිරීමකින් හෙළි වී තිබෙනවා.

Compare the Market ආයතනය නිකුත් කළ Senior Healthcare Quality Index මගින් ප්‍රාන්ත සහ කලාප අතර සෞඛ්‍ය සේවාවල ගුණාත්මකභාවය, රෝහල් පහසුකම්, හදිසි ප්‍රතිකාර සඳහා ගතවන කාලය සහ වැඩිහිටි සත්කාර සේවා ඇතුළු කරුණු රැසක් ඇගයීමට ලක් කර තිබෙනවා.

එහිදී New South Wales ලකුණු 67.9ක් ලබා පළමු ස්ථානය හිමිකරගෙන ඇති අතර Australian Capital Territory ලකුණු 66.1ක් සමඟ දෙවැනි ස්ථානයට පත්වුණා.

Victoria ලකුණු 60.7ක් ලබා තුන්වැනි ස්ථානයට පත්ව ඇති අතර Queensland සහ Western Australia පිළිවෙළින් සිව්වැනි සහ පස්වැනි ස්ථානවල රැඳී සිටිනවා.

NSW හි වැඩිහිටි සත්කාර මධ්‍යස්ථානවල සේවා අත්දැකීමද සාපේක්ෂව ඉහළ මට්ටමක පවතින අතර, එහි සත්කාර ලබන පුද්ගලයන්ගෙන් 65.3%ක් එම අත්දැකීම තරු හතරක් හෝ ඊට වැඩි මට්ටමකට ඇගයීමට ලක්කර ඇති බව වාර්තා වනවා.

ශ්‍රේණිගත කිරීමේ අවසන් ස්ථානය South Australiaට හිමිව ඇති අතර, එහි හදිසි ප්‍රතිකාර සඳහා රෝගීන්ට රැඳී සිටීමට සිදුවන සාමාන්‍ය කාලය විනාඩි 212ක් ලෙස සටහන් වී තිබෙනවා.

ජනගහනය වයස්ගත වන පසුබිමක, විශ්‍රාම ජීවිතය සඳහා ප්‍රාන්තයක් තෝරාගැනීමේදී ජීවන වියදමට අමතරව සෞඛ්‍ය සේවා සහ වැඩිහිටි සත්කාර පහසුකම් පිළිබඳවද අවධානය යොමු කිරීම වැදගත් වනු ඇති.