ඔස්ට්‍රේලියා සහ නවසීලන්ත සංචාරක වෙළඳපොළ තුළ ශ්‍රී ලංකාව තවදුරටත් ප්‍රවර්ධනය කිරීම සඳහා ශ්‍රී ලංකා සංචාරක ක්ෂේත්‍රය විසින් විශේෂ ජාත්‍යන්තර ප්‍රවර්ධන වැඩසටහනක් ක්‍රියාත්මක කර තිබෙනවා.

Sri Lanka Tourism B2B Networking and Roadshow 2026 ලෙස නම් කර ඇති මෙම වැඩසටහනේ නවසීලන්ත අදියර Christchurch සහ Auckland නගරවලින් ආරම්භ වී ඇති අතර, පසුව ඔස්ට්‍රේලියාවේ Sydney, Adelaide සහ Perth නගර දක්වා එය ක්‍රියාත්මක කර තිබෙනවා.

මෙහිදී ශ්‍රී ලංකාවේ හෝටල්, සංචාරක මෙහෙයුම්කරුවන්, Destination Management සමාගම් ඇතුළු සංචාරක ක්ෂේත්‍රයේ ආයතන 50කට වැඩි සංඛ්‍යාවක් සහභාගී වී ඇති අතර, ඔස්ට්‍රේලියා සහ නවසීලන්ත සංචාරක වෘත්තිකයන් සමඟ සෘජු ව්‍යාපාරික සබඳතා ගොඩනගා ගැනීමට අවස්ථාව හිමිවී තිබෙනවා.

B2B සාකච්ඡා, මාධ්‍ය හමුවීම්, ජාත්‍යන්තර Influencers සමඟ විශේෂ වැඩසටහන්, ශ්‍රී ලංකා නිලධාරීන් සමඟ ප්‍රශ්න සහ පිළිතුරු සැසි සහ Gala Dinner ඇතුළු වැඩසටහන් රැසක් මෙයට ඇතුළත්.

ශ්‍රී ලංකාවේ වෙරළ තීරය, වනජීවී, සංස්කෘතික උරුමය, ආහාර, Wellness සහ Adventure Tourism ඇතුළු සංචාරක ආකර්ෂණයන් ජාත්‍යන්තර ප්‍රේක්ෂකයන් අතර තවදුරටත් ප්‍රචලිත කිරීම සඳහා ජනප්‍රිය Influencers පිරිසක් ශ්‍රී ලංකාවේ සංචාර සඳහා එක් කිරීමටද සැලසුම් කර තිබෙනවා.

මෙම ශ්‍රී ලංකා සංචාරක නියෝජිත පිරිසට සංචාරක නියෝජ්‍ය අමාත්‍ය Ruwan Ranasingha ඇතුළු රජයේ සහ සංචාරක ක්ෂේත්‍රයේ ජ්‍යෙෂ්ඨ නියෝජිතයන් එක්ව සිටිනවා.

ශ්‍රී ලංකා සංචාරක ප්‍රවර්ධන කාර්යාංශය සහ O2O Events විසින් 2024 වසරේදීත් ඔස්ට්‍රේලියාවේ Brisbane, Sydney සහ Melbourne නගර ආශ්‍රිතව මෙවැනි ප්‍රවර්ධන වැඩසටහනක් ක්‍රියාත්මක කර තිබූ අතර, එම වැඩසටහනෙන් පසුව ඔස්ට්‍රේලියාවෙන් ශ්‍රී ලංකාවට පැමිණි සංචාරකයන්ගේ සංඛ්‍යාව 22.5%කින් ඉහළ ගොස් ඇති බව සංවිධායකයන් පවසනවා.

2026 වැඩසටහනේ ප්‍රධාන අරමුණ වන්නේ එම වර්ධනය තවදුරටත් ශක්තිමත් කරමින් ඔස්ට්‍රේලියාව සහ නවසීලන්තයෙන් ශ්‍රී ලංකාවට පැමිණෙන සංචාරකයන්ගේ සංඛ්‍යාව ඉහළ නැංවීමයි.