වික්ටෝරියා ප්‍රාන්තයේ සිඟමන් යැදීම අපරාධයක් ලෙස සැලකීම අවසන් කරමින් නව නීති සංශෝධන ක්‍රියාත්මක කර තිබෙනවා.

ඒ අනුව, පොදු ස්ථානවල සිඟමන් යැදීම පමණක් හේතුවෙන් පුද්ගලයෙකුට අපරාධ චෝදනාවක් එල්ල කිරීමට තිබූ නීතිමය හැකියාව ඉවත් කර ඇති බවටයි වාර්තාවන්නේ.

දුප්පත්කම සහ නිවාස නොමැතිවීම වැනි සමාජ ගැටලුවලට මුහුණ දෙන පුද්ගලයන්ට දඬුවම් කිරීම වෙනුවට, ඔවුන්ට අවශ්‍ය සහාය ලබාදීම කෙරෙහි අවධානය යොමු කිරීම මෙම නීති වෙනසේ ප්‍රධාන අරමුණක්.

කෙසේ වෙතත්, මෙම සංශෝධනය සම්බන්ධයෙන් මෙල්බන් නගරයේ ව්‍යාපාරිකයන්ගෙන් විරෝධයක්ද එල්ල වී ඇති අතර, එය නගර මධ්‍යයේ ව්‍යාපාර කටයුතු සහ පාරිභෝගිකයන්ට බලපෑම් ඇති කළ හැකි බව ඔවුන් පෙන්වා දෙනවා.

විශේෂයෙන්ම පොදු ස්ථානවල සිඟමන් යැදීම සමඟ ජනතාවට බාධා වන හැසිරීම් වැඩිවිය හැකි බවට ඇතැම් ව්‍යාපාරිකයන් කනස්සල්ල පළ කර තිබෙනවා.

නීති වෙනසට සහාය දක්වන පාර්ශ්ව පවසන්නේ සිඟමන් යැදීම අපරාධයක් බවට පත් කිරීමෙන් දුප්පත්කමට හෝ නිවාස නොමැතිකමට විසඳුමක් නොලැබෙන බවයි.

ඒ අනුව, වික්ටෝරියා හි සිඟමන් යැදීම අපරාධයක් නොවන තත්ත්වයට පත් කිරීමත් සමඟ, සමාජ සහාය ලබාදීම සහ මහජන ස්ථානවල සාමය ආරක්ෂා කිරීම අතර සමබරතාව පිළිබඳව මේ වනවිට නව කතාබහක් මතුව තිබෙනවා