වික්ටෝරියානු සේවකයන්ට සතියකට දින දෙකක් නිවසේ සිට වැඩ කිරීමට නීතිමය අයිතිය ලබාදීමට යෝජිත පනත් කෙටුම්පත හදිසියේ ප්‍රමාද වී තිබෙනවා.

මෙම පනත ප්‍රාන්ත පාර්ලිමේන්තුවේ විශේෂ කමිටුවකට යොමු කිරීමේ යෝජනාව ඡන්ද 18ට 17ක් ලෙස සම්මත වුණා.

කමිටුව විසින් ඔක්තෝබර් 20 වැනිදාට පෙර සිය වාර්තාව ඉදිරිපත් කිරීමට නියමිතයි.

එහෙත් නොවැම්බර් ප්‍රාන්ත මැතිවරණයට පෙර පැවැත්වෙන අවසන් පාර්ලිමේන්තු දිනය සැප්තැම්බර් 24 වැනිදා බැවින්, මැතිවරණයට පෙර පනත සම්මත වීමේ අවස්ථාව බොහෝ දුරට අහිමි වී තිබෙනවා.

රැකියාව නිවසේ සිට සිදුකිරීමට සාධාරණව හැකි නම්, ස්ථිර, අර්ධකාලීන සහ අනියම් සේවකයන්ටද මෙම අයිතිය ලබාදීමට යෝජනා කර තිබුණා.

එහෙත් සේවකයා නිවසේ සිට වැඩ කිරීමෙන් ආයතනයේ කාර්යක්ෂමතාවට හෝ ඵලදායිතාවට බලපෑමක් ඇතිවන්නේ නම් එය ප්‍රතික්ෂේප කිරීමට සේවායෝජකයාට හැකියාව ලබාදීමටද සංශෝධන ඉදිරිපත් කර තිබෙනවා.

පනත සම්පූර්ණයෙන් අහෝසි කර නොමැති නමුත් එහි අනාගතය නොවැම්බර් මාසයේ පැවැත්වෙන වික්ටෝරියා ප්‍රාන්ත මැතිවරණයෙන් පසු තීරණය වීමට ඉඩ ඇති බවයි වාර්තා වන්නේ.