ඔස්ට්‍රේලියාවේ Woolworths සුපිරි වෙළඳසැල් ජාලය විසින් පවුල් සඳහා අත්‍යවශ්‍ය භාණ්ඩ 300ක මිල මාස තුනක් සඳහා නොවෙනස්ව තබන බව ප්‍රකාශ කර තිබියදී, එම වැඩසටහන අතරතුර භාණ්ඩ කිහිපයක මිල ඉහළ ගොස් ඇති බවට චෝදනා එල්ල වී තිබෙනවා.

මිල සම්බන්ධ දත්ත අනුව, එම වැඩසටහන ආරම්භ කිරීමෙන් පසු ඇතැම් භාණ්ඩවල මිල සැලකිය යුතු ලෙස වෙනස් වී ඇති අතර, එක් කුකුළු මස් නිෂ්පාදනයක මිල 33%කින් ඉහළ ගොස් ඇති බවටයි වර්තා වන්නේ.

අදාළ නිෂ්පාදනයේ මිල අප්‍රේල් 29 වනදා ඩොලර් 9ක්ව පැවති අතර, මැයි 5 වනදා වන විට එය ඩොලර් 12ක් දක්වා ඉහළ ගොස් ඇති බව දත්තවලින් පෙන්වා දෙනවා.

තවත් භාණ්ඩ කිහිපයකද මිල වෙනස් වී ඇති අතර, ටින් කළ ආහාරයක් සෙන්ට් 60 සිට ඩොලර් 1ක් දක්වා ඉහළ ගොස් පසුව නැවත සෙන්ට් 60 දක්වා අඩු වී ඇති බව සඳහන්.

කෙසේ වෙතත් වැඩසටහන යටතේ ස්ථාවරව තබා ඇත්තේ භාණ්ඩවල සාමාන්‍ය මිල බවත්, ඊට පෙර පැවති අඩු මිල ගණන් තාවකාලික වට්ටම් ලෙස ලබාදුන් ඒවා බවත් Woolworths පවසනවා.

මේ අතර පාරිභෝගික අයිතිවාසිකම් පිළිබඳ කණ්ඩායම් පෙන්වා දෙන්නේ සාමාන්‍ය මිල සහ වට්ටම් මිල අතර වෙනස පාරිභෝගිකයන්ට පැහැදිලිව හඳුනාගැනීමට අපහසු විය හැකි බැවින්, මිල වෙනස්කම් පිළිබඳ වැඩි පැහැදිලිභාවයක් අවශ්‍ය බවයි.

ජීවන වියදම ඉහළ යමින් පවතින අවස්ථාවක අත්‍යවශ්‍ය භාණ්ඩවල මිල සම්බන්ධයෙන් පාරිභෝගික අවධානය ඉහළ ගොස් ඇති අතර, Woolworths හි මෙම මිල වෙනස්කම් සම්බන්ධයෙන්ද මේ වනවිට වැඩි අවධානයක් යොමුවී තිබෙනවා.