ඉන්දුනීසියාවේ බාලි දූපතේ පිහිටි අවන්හලක පැවැති උපන්දින සාදයක් අතරතුර, ගෑස් බැලූන කිහිපයක් හදිසියේ පිපිරී යාමෙන් හටගත් විශාල ගින්නක් හේතුවෙන් ඔස්ට්‍රේලියානු පවුලක් දැඩි අර්බුදයකට ලක්ව සිටිනවා.

සිය පියාගේ 70 වන උපන්දිනය සැමරීම සඳහා බාලිහි අවන්හලක් වෙත පැමිණි මෙම පවුලේ සාමාජිකයන් ගෙන ආ බැලූන කිහිපයක් හදිසියේම පිපිරී ගොස් ඇති අතර, ඒ සමඟ අවන්හල පුරාම ගිනිදැල් පැතිර ගොස් තිබෙනවා.

මෙම සිදුවීමෙන් 17 හැවිරිදි තරුණයෙකු පිළිස්සුම් තුවාල ලබා රෝහල්ගත කෙරුණා.

ගින්න හටගත් අවස්ථාවේ අවන්හල තුළ සිය ගණනක පිරිසක් සිට ඇති අතර, මෙම ඔස්ට්‍රේලියානු පවුල සාක්ෂිකරුවන් ලෙස පවසමින් බාලි පොලිසිය විසින් ඔවුන්ගේ Passports අත්අඩංගුවට ගෙන තිබෙනවා.

නැවත ඔස්ට්‍රේලියාවට පැමිණීමට ගුවන්තොටුපොළ වෙත ගිය අවස්ථාවේදීද ඔවුන්ගේ Passports යළි ලබාගෙන ඇති බවයි වාර්තා වන්නේ.

මේ අතර පීඩාවට පත් ඔස්ට්‍රේලියානු ජාතික කාන්තාව පවසන්නේ තමන් කිසිදු වරදක් කර නොමැති අතර බැලූන අලෙවි කළ පුද්ගලයා ලබා දී ඇත්තේ time bomb එකක් වැනි දෙයක් බවයි.

තමන් සාක්ෂිකරුවන් පමණක් වන බැවින් මෙලෙස රටින් පිටවීම තහනම් කිරීම අසාධාරණ බව පවසන එම පවුල, සිද්ධිය සම්බන්ධයෙන් ඉන්දුනීසියානු ආගමන විගමන බලධාරීන් සමඟ සාකච්ඡා කරමින් සිටින බව ද වාර්තා වනවා.