‘Red Centre’ සහ Alice Springs ප්‍රදේශයේ සංචාරය කිරීමට බලාපොරොත්තු වන ඔස්ට්‍රේලියානුවන් සඳහා ඩොලර් 500ක් වටිනා සංචාරක වවුචර් පිරිනැමීමේ විශේෂ වැඩසටහනක් ආරම්භ කර තිබෙනවා.

Tourism Central Australia (TCA) ආයතනය මගින් සංවිධානය කරන මෙම වැඩසටහන ක්‍රියාත්මක වන්නේ First-come, first-served යන පදනම මතයි.

පවතින අධික ජීවන වියදම හමුවේ ප්‍රාදේශීය සංචාරක ව්‍යාපාර මුහුණ දී ඇති ආර්ථික අභියෝගවලට සහනයක් ලෙස සහ ජනතාවගේ සංචාරක පිරිවැය අඩු කිරීමේ අරමුණින් මෙම වැඩසටහන හඳුන්වා දී තිබෙනවා.

මෙමගින් පිරිනැමීමට නියමිත වවුචර් පතක් මගින් මධ්‍යම ඔස්ට්‍රේලියානු කලාපයේ Caravan parks සහ කඳවුරු බිම්වල (Campgrounds) දින කිහිපයක් නවාතැන් ගැනීමේ පහසුකම් ලබාගත හැකියි.

සැප්තැම්බර් 30 වනදා දක්වා මෙම වවුචර් 600 සඳහා ඉල්ලුම් කළ හැකි අතර, අදාළ සංචාරක කාලසීමාව 2026 ඔක්තෝබර් 5 වනදා සිට 2027 ජූනි 30 දක්වා වලංගු වන බවයි සංවිධායකයින් සඳහන් කරන්නේ.

Tourism Central Australiaහි ප්‍රධාන විධායක නිලධාරී Danial Rochford ප්‍රකාශ කළේ, ජනතාවට නගරවලින් බැහැරව සොබාදහම අත්විඳීමට මෙය හොඳම අවස්ථාවක් වන බවයි.

මෙම වවුචර් සඳහා ඉල්ලුම් කිරීමට කැමති පුද්ගලයින්ට Discover Central Australia නිල වෙබ් අඩවිය ඔස්සේ ලියාපදිංචි විය හැකි අතර, සුදුසුකම් ලබන සංචාරකයින් ඔක්තෝබර් 5 වනදා වන විට දැනුවත් කිරීමට නියමිතයි.