ඔස්ට්‍රේලියාවේ අනෙකුත් ප්‍රාන්ත සමඟ සසඳන විට නිවාස මිලදී ගැනීම සඳහා සාපේක්ෂව පහසුම ප්‍රාන්තය ලෙස වික්ටෝරියා ප්‍රාන්තය නම් කර තිබෙනවා.

කෙසේ වෙතත්, වික්ටෝරියා ප්‍රාන්තය එලෙස නම් කර තිබුණත් සාමාන්‍ය ආදායමක් ලබන පවුල්වලට තමන්ගේම නිවසක් මිලදී ගැනීම තවමත් දැඩි අභියෝගයක් බවයි නව වාර්තාවකින් හෙළි වී ඇත්තේ.

පසුගිය මූල්‍ය වසරේදී වික්ටෝරියා ප්‍රාන්තයේ විකිණීමට තිබූ නිවාස අතරින් සාමාන්‍ය ආදායමක් ලබන පවුලකට තමන්ට දැරිය හැකි මට්ටමක පැවතියේ නිවාස සියයකින් 16ක් පමණක් බව වාර්තාව පෙන්වා දෙනවා.

අඩු ආදායමක් ලබන පවුල් සඳහා මෙම තත්ත්වය තවත් දුෂ්කර වී ඇති අතර, ඔවුන්ට දැරිය හැකි මට්ටමක පැවතියේ විකිණීමට තිබූ නිවාස සියයකින් දෙකක් පමණක් බව සඳහන්.

නිවාස මිල ඇතැම් ප්‍රදේශවල සාපේක්ෂව පහළ ගොස් තිබුණත්, නිවාස ණය සඳහා ගෙවිය යුතු පොලිය සහ මාසික ණය වාරික ඉහළ මට්ටමක පැවතීම නිසා බොහෝ පවුල්වලට නිවසක් මිලදී ගැනීම තවමත් අපහසු වී තිබෙනවා.

ඒ අතර ඔස්ට්‍රේලියාවේ සමස්ත නිවාස වෙළෙඳපොළ තුළද සාමාන්‍ය ආදායමක් ලබන පවුල්වලට දැරිය හැකි නිවාස ප්‍රමාණය අඩු වී ඇති අතර, නිවාස මිල සහ පවුල් ආදායම් අතර පවතින විශාල පරතරය ඊට ප්‍රධාන හේතුවක් වී තිබෙනවා.

ඒ අනුව වික්ටෝරියා ප්‍රාන්තය රටේ අනෙකුත් ප්‍රාන්තවලට සාපේක්ෂව නිවාස මිලදී ගැනීමට පහසුම ප්‍රාන්තය ලෙස සැලකුණත්, සාමාන්‍ය ජනතාවට තමන්ගේම නිවසක් මිලදී ගැනීමේ සිහිනය සැබෑ කර ගැනීම තවමත් විශාල අභියෝගයක් බව මෙම වාර්තාවෙන් පැහැදිලි වෙනවා.