සිඩ්නි නුවර පදිංචි 36 හැවිරිදි Callum Forbes ප්‍රංශයේ සංචාරයක නිරතව සිටියදී, ඔහුගේ සහකරු විසින් උණු වතුරෙන් පුළුස්සා සාස්පානකින් පහරදුන් බව කියන බිහිසුණු සිදුවීමක් පිළිබඳ තොරතුරු හෙළි වී තිබෙනවා.

මෙම ප්‍රහාරයෙන් Forbesගේ මුහුණ, ගෙල, පපුව සහ අත්වලට දෙවැනි මට්ටමේ පිළිස්සුම් තුවාල සිදුවී ඇති අතර, ඔහුගේ කන් බෙරයට හා මුහුණටද බරපතළ හානි සිදුව ඇති බව සඳහන්.

ඔවුන් දෙදෙනා ප්‍රංශයේ Loire Valley ප්‍රදේශයේ සුඛෝපභෝගී හෝටලයක නවාතැන් ගෙන සිටියදී, නිදි පෙත්තක් ලබාගෙන නින්දට ගිය Forbes මෙම හදිසි ප්‍රහාරයට ලක්ව ඇති බවයි වාර්තා වන්නේ.

ප්‍රහාරය ආරම්භ වීමත් සමඟ කාමරයෙන් පලා යාමට උත්සාහ කළද, දොර අගුළු දමා යතුර ඉවත් කර තිබූ නිසා ඔහුට පිටතට යාමට නොහැකි වූ බව Forbes පවසා තිබෙනවා.

අවසානයේ නාන කාමරය තුළට පැන දොර අගුළු දමාගෙන ජීවිතය බේරාගත් ඔහු, හෝටල් සේවිකාවක් පැමිණ දොරට තට්ටු කිරීමෙන් පසුව පමණක් පිටතට පැමිණ තිබෙනවා.

ප්‍රහාරයෙන් පසු කුලී මෝටර් රථයකින් පලාගිය බව කියන 37 හැවිරිදි David Cao, හෝටලයේ සිට කිලෝමීටර් 500ක් පමණ දුරින් බෙල්ජියම් දේශසීමාව ආසන්නයේ පිහිටි Lille දුම්රිය ස්ථානයේදී පොලීසිය විසින් අත්අඩංගුවට ගෙන තිබෙනවා.

මිනීමැරීමට තැත් කිරීමේ චෝදනාව යටතේ David Cao ප්‍රංශ බන්ධනාගාරයක රඳවා සිටින අතර, Forbes සති තුනක් ප්‍රංශ රෝහලක ප්‍රතිකාර ලබා ගැනීමෙන් පසු සිය මව සමඟ නැවත සිඩ්නි නුවරට පැමිණ ඇති බවයි වාර්තා වන්නේ.