සතුන් ස්පර්ශ කිරීමෙන් පසුව, ආහාර ගැනීමට පෙර සහ වැසිකිළි භාවිතයෙන් පසුව සබන් යොදා හොඳින් අත් සේදීමට කුඩා දරුවන් යොමු කරන ලෙස වික්ටෝරියා සෞඛ්‍ය බලධාරීන් මව්පියන්ගෙන් ඉල්ලීමක් කරනවා.

එමෙන්ම නොපිසූ මස්, පැස්ටරීකරණය නොකළ කිරි හෝ බීම වර්ග, නොසෝදන ලද එළවළු සහ පිරිසිදු නොකළ ජලය භාවිතයෙන් වළකින ලෙසයි ඔවුන් උපදෙස් දී ඇත්තේ.

මෙල්බන්හි Petting Zoo හෙවත් සතුන් ඇල්ලීමට සහ නරඹන්නන්ට සමීප වීමට ඉඩ සලසන ස්ථානයක සංචාරය කිරීමෙන් අනතුරුව, දුර්ලභ බැක්ටීරියා ආසාදනයකට ලක්වූ වයස අවුරුදු 3ක කුඩා දැරියක් ජීවිතක්ෂයට පත්වුණා.

සතුන් ඇල්ලීමෙන් පසු Shiga toxin නිපදවන E. coli (STEC) නමැති බැක්ටීරියාව ශරීරගත වීමෙන් මෙම දැරිය දැඩි ලෙස ගිලන්වී තිබෙනවා.

එමගින් ඇතිවූ HUS (Hemolytic Uremic Syndrome) නමැති සංකූලතාව හේතුවෙන් ඇයගේ වකුගඩු අක්‍රිය වී, මොළයට ද බරපතල හානි සිදු වීමෙන් ඇය මෙලෙස මියගොස් ඇති බවයි වාර්තා වන්නේ.

මේ අතර තවත් අවුරුදු 2ක පිරිමි දරුවෙකු ද මෙම ආසාදනයට ලක්වූ අතර ඔහු මේ වන විට සුවය ලබා තිබෙනවා.

වික්ටෝරියානු සෞඛ්‍ය බලධාරීන් පවසන්නේ අදාළ සත්ව ගොවිපළවල්වල කිසිදු වරදක් හමුවී නොමැති අතර, එකම ස්ථානයකින් පමණක් මෙම බැක්ටීරියාව ව්‍යාප්ත වූ බවට සාක්ෂි නොමැති බවයි.

ගවයින්, එළුවන් සහ බැටළුවන් වැනි සතුන්ගේ සිරුරු තුළ මෙම බැක්ටීරියාව ස්වාභාවිකවම පවතින අතර, සතුන්ට ඉන් හානියක් නොවන බවයි සෞඛ්‍ය අංශ පෙන්වා දෙන්නේ.