ඔස්ට්‍රේලියාවට අයත් ඉන්දියන් සාගරයේ පිහිටි Christmas Island සහ Cocos Islands දූපත් වැසියන් වෙත Qantas ගුවන් සේවය පනවා ඇති අලුත් ගමන් මලු සීමා සහ ගාස්තු සංශෝධන හේතුවෙන් එම දූපත්වාසීන් දැඩි අපහසුතාවට පත්ව තිබෙනවා.

ඔස්ට්‍රේලියානු ප්‍රධාන භූමියේ සිට Perth නගරය හරහා Christmas සහ Cocos Islands වෙත පියාසර කරන ගුවන් වාර සඳහා මෙතෙක් පැවති ගමන් මලු සහන පහත හෙලීමටයි Qantas සමාගම තීරණය කර ඇත්තේ.

ඒ අනුව ලබන ඔක්තෝබර් 01 වැනිදා සිට නොමිලේ හිමිවන ගමන් මලු සඳහා මෙතෙක් පැවති කිලෝග්‍රෑම් 30 සීමාව කිලෝග්‍රෑම් 23 දක්වා අඩු කෙරෙනවා.

අතිරේක ගමන් මලු ගාස්තු ද ඉහළ නංවා ඇති අතර අමතර ගමන් මලු සඳහා කිලෝග්‍රෑම් එකකට අය කළ මුදල ඩොලර් 3.33 සිට ඩොලර් 10.26 දක්වා 208% කින් ඉහළ දමා තිබෙනවා.

අමතර ගමන් මලු ලබාගත හැක්කේ ගුවන්තොටුපළට පැමිණීමෙන් පසුව පමණක් වන අතර, එය කිලෝග්‍රෑම් 46 සීමාවකට යටත් වනවා.

මේ සම්බන්ධයෙන් අදහස් දක්වන දූපත් වැසියන් පවසන්නේ තමන් ජීවත් වන හුදකලා දූපත් වෙත ළදරු කිරිපිටි, Nappies සහ අනෙකුත් අත්‍යවශ්‍ය ගෘහ භාණ්ඩ ගෙන ඒමට ඇති එකම මාර්ගය මෙම ගුවන් ගමන් බවයි.

නැව් මගින් භාණ්ඩ ගෙන ඒමට සති ගණනාවක් ගතවන බැවින් Qantas ගුවන් සේවයේ මෙම තීරණය තමන්ට සිදුවූ දැඩි පහරක් බවටයි ඔවුන් චෝදනා කරන්නේ.

මේ අතර දූපත් වෙනුවෙන් පෙනී සිටින පාර්ලිමේන්තු මන්ත්‍රී Marion Scrymgour ඇතුළු මහජන නියෝජිතයින් Qantas සමාගමේ ප්‍රධාන විධායක නිලධාරිනිය වෙත ලිපියක් යොමු කරමින් ඉල්ලා ඇත්තේ, මෙම අසාධාරණ තීරණය වහාම හකුලා ගන්නා ලෙසයි.

කෙසේ වෙතත් Qantas සමාගම පවසන්නේ ගුවන් යානයේ බර පාලනය කිරීමටත්, සංචාරකයින් සඳහා වැඩි ආසන ප්‍රමාණයක් වෙන් කිරීමටත් මෙම තීරණය උපකාරී වන බවයි.