පලාවු රාජ්‍යයේ පැවැත්වෙන Pacific Islands සංසදයේ නායක සමුළුවට තායිවාන විදේශ අමාත්‍ය ලින් චියා ලන්ග් සහ විශාල නියෝජිත කණ්ඩායමක් සහභාගී වීම සම්බන්ධයෙන් චීනය දැඩි විරෝධය පළකර තිබෙනවා.

චීනයේ Pacific කලාපීය විශේෂ නියෝජිත චියෑන් බෝ, තායිවානය වෙත සමුළුවේ ලබාදී ඇති ස්ථානය පිළිබඳ “බරපතළ කනස්සල්ලක්” ඇති බව පවසමින්, මෙවැනි ක්‍රියා සඳහා සෑමවිටම “ප්‍රතිවිපාක” පවතින බව සඳහන් කළා.

කෙසේවෙතත්, තම ප්‍රකාශය තර්ජනයක් නොවන බව ඔහු පැවසුවද, තායිවානය සමුළුවට සහභාගී වීම අනුමත කළ නොහැකි සහ නුසුදුසු ක්‍රියාවක් බව අවධාරණය කර තිබෙනවා.

මේ සම්බන්ධයෙන් ප්‍රතිචාර දැක්වූ අගමැති Anthony Albanese, සමුළුවට සහභාගී වන්නේ කවුදැයි තීරණය කරන්නේ Pacific Islands සංසදය මිස බාහිර රටක් නොවන බව ප්‍රකාශ කළා.

චීනය සහ තායිවානය දෙරටම සාමාජිකයින් 18 දෙනෙකුගෙන් සමන්විත සංසදයේ නිල සාමාජිකයින් නොවන අතර, චීනය dialogue partner රටක් ලෙසත් තායිවානය 1993 සිට development partner ලෙසත් සම්බන්ධ වී සිටිනවා.

පලාවු, ටුවාලු සහ මාෂල් දූපත් යන Pacific රටවල් තුන පමණක් තවමත්  තායිවානය සමඟ නිල රාජ්‍යතාන්ත්‍රික සබඳතා පවත්වාගෙන යන අතර, සමුළුවේ සත්කාරක පලාවු රාජ්‍යය තායිවානය වෙත ආරාධනා කර තිබෙනවා.

Australia චීනය සමඟ නිල සබඳතා පවත්වාගෙන යන අතර Taiwan සමඟ නිල නොවන සබඳතා පවත්වාගෙන යන පසුබිමක, මෙම සිදුවීම Pacific කලාපය තුළ චීනය සහ බටහිර රටවල් අතර බල තරගය තවත් ඉහළ යන ලකුණක් ලෙසයි සැලකෙන්නේ.