ඔස්ට්‍රේලියාවේ සිඩ්නි නුවර ඔබර්න් (Auburn) ප්‍රදේශයේ කුණු බඳුනක තිබී අලුත උපන් පිරිමි බිළිඳෙකුගේ මළසිරුරක් අද පෙරවරුවේ සොයාගෙන තිබෙනවා.

ප්‍රදේශවාසී කාන්තාවක විසින් ප්ලාස්ටික් බෑගයක දමා තිබූ මෙම බිළිඳු සිරුර දැක ඒ පිළිබඳව වහාම පොලිසිය දැනුවත් කර ඇති බවයි වාර්තා වන්නේ.

සිද්ධිය සම්බන්ධයෙන් විශේෂ පරීක්ෂණයක් ආරම්භ කර ඇති සිඩ්නි පොලිසිය, මියගිය බිළිඳා මීට පැය තිස්හයකට පමණ පෙර උපත ලබා ඇති බවට සැකකරනවා.

මෙම ඛේදනීය සිදුවීමත් සමඟ අදාළ බිළිඳාගේ මවගේ ජීවිත ආරක්ෂාව පිළිබඳව දැඩි අවදානම් තත්ත්වයක් සහ සැකයක් මතුව තිබෙනවා.

ඒ අනුව එම මවට වහාම වෛද්‍ය ප්‍රතිකාර අවශ්‍ය විය හැකි බැවින්, ළඟම ඇති රෝහල වෙත පැමිණෙන ලෙසයි පොලිසිය ඇගෙන් ඉල්ලා සිටින්නේ.

තවද, මෙම සිදුවීමට සම්බන්ධ යම් තොරතුරක් හෝ රථවාහන කැමරා දර්ශන පවතින්නේ නම් වහාම පොලිසිය වෙත ලබාදෙන ලෙස මහජනතාවගෙන් ඉල්ලීමක් කෙරෙනවා.

පොලිසියේ ප්‍රධානතම අවධානය යොමුව ඇත්තේ මව සොයා ඇයට අවශ්‍ය වෛද්‍ය සහ මනෝප්‍රතිකාර සහාය ලබාදීමට බවයි බලධාරීන් වැඩිදුරටත් සඳහන් කරන්නේ.