Melbourne ඇතුළු Victoria ප්‍රාන්තයේ පැවැත්වූ ප්‍රධාන ක්‍රීඩා සහ විනෝදාස්වාද උත්සව මගින් 2026 වසරේ ප්‍රාන්ත ආර්ථිකයට ඩොලර් බිලියන 3.64ක පමණ ආර්ථික බලපෑමක් ඇතිවී තිබෙන බව නව වාර්තාවකින් අනාවරණය වී තිබෙනවා.

එම උත්සව සඳහා සහභාගී වූ සමස්ත පිරිස මිලියන 7.9ක් වන අතර, ඉන් 848,000කට වැඩි පිරිසක් වෙනත් ප්‍රාන්ත සහ විදේශයන්හි සිට Victoria වෙත පැමිණි අය බව සඳහන්.

මෙය 2022 වසරේ වාර්තා වූ ඩොලර් බිලියන 3.3ක ආර්ථික බලපෑම හා සසඳන විට සැලකිය යුතු වර්ධනයක් වන අතර, එම කාලයේ උත්සව සඳහා සහභාගී වූ පිරිසද මිලියන 7.2ක් පමණ වී තිබෙනවා.

ඉදිරි මාස කිහිපය තුළ Melbourne හි ප්‍රධාන ක්‍රීඩා උත්සව රැසක් පැවැත්වීමට නියමිත බැවින්, ඒ හරහා තවත් විශාල සංචාරක පිරිසක් Victoria වෙත පැමිණෙනු ඇතැයි අපේක්ෂා කෙරෙන බවටයි වාර්තා වන්නේ.

ඒ අතර AFL අවසන් තරග, Melbourne Cup, Australian Open සහ Formula One තරගාවලිය මෙන්ම සැප්තැම්බර් 11 වැනිදා පැවැත්වෙන ඇමරිකානු පාපන්දු තරගයක්ද ප්‍රධාන උත්සව අතරට ඇතුළත්.

මෙම උත්සව හරහා සංචාරක, හෝටල් සහ ආහාරපාන ඇතුළු ක්ෂේත්‍රවලට විශාල ආදායමක් ලැබෙන අතර, ඉදිරි මාස කිහිපය තුළ හෝටල්වල කාමර වෙන්කරවා ගැනීම්ද ඉහළ යමින් පවතින බව වාර්තා වනවා.

මේ හේතුවෙන් Melbourne ඕස්ට්‍රේලියාවේ ප්‍රධාන ක්‍රීඩා නගරය ලෙස තවදුරටත් ප්‍රවර්ධනය කරමින් වැඩි සංචාරකයන් පිරිසක් ආකර්ෂණය කර ගැනීමට Victoria සංචාරක බලධාරීන් නව ප්‍රචාරණ වැඩසටහනක්ද ආරම්භ කර තිබෙනවා.