ඔස්ට්‍රේලියාවේ පවතින සංක්‍රමණික ප්‍රතිපත්තිවලට එරෙහිව මෙල්බන්හි පැවැති “March for Australia” දැවැන්ත විරෝධතා පාගමන අතරතුර, One Nation නායිකා පෝලීන් හැන්සන්ට විරෝධතාකරුවන්ගෙන් හූ හඩ සහ දැඩි විවේචන එල්ල වී තිබෙනවා.

මෙල්බන් පාර්ලිමේන්තු සංකීර්ණය අසල රැස්වූ සිය ගණනක් වන විරෝධතාකරුවන් ඇමතූ  දක්ෂිණාංශික ක්‍රියාකාරිකයෙකු වන Hugo Lennon සඳහන් කළේ, මෙම සමුළුවට පැමිණෙන ලෙස කළ ආරාධනාව පෝලීන් හැන්සන් විසින් ප්‍රතික්ෂේප කළ බවයි.

වන් නේෂන් පක්ෂය තම සංක්‍රමණික විරෝධී ප්‍රතිපත්ති ලිහිල් කරමින් සිටින බවට චෝදනා කරමින් විරෝධතාකරුවන් පෝලීන් හැන්සන්ට එරෙහිව නගරය පුරා විරෝධතා පාගමනක නිරත වුණා.

කෙසේවෙතත්, එදින ඇයට වෙනත් පෙර සූදානම් වූ වැඩසටහන් තිබූ බවයි පක්ෂ ප්‍රකාශකයෙකු සඳහන් කළේ.

මෙම තත්ත්වය හටගෙන ඇත්තේ ‘වන් නේෂන්’ පක්ෂයේ සංක්‍රමණික ප්‍රතිපත්තිය පිළිබඳව පක්ෂයේ අභ්‍යන්තර නායකයින් අතර විවිධ අදහස් පළවීමත් සමඟයි.

වසරකට ශුද්ධ සංක්‍රමණිකයින් 130,000කට සීමා කරන බව පක්ෂය ප්‍රකාශ කළද, ඊට අමතරව තවත් 100,000ක් පැමිණිය හැකි බවට මන්ත්‍රී David Farley ප්‍රකාශ කිරීමත් සමඟ මෙම අවුල් සහගත තත්ත්වය මතුව තිබෙනවා.

මේ අතර, පාගමන අතරතුර පොලිස් නිලධාරීන්ට පහරදීම සහ සාමය කඩකිරීම යන චෝදනා යටතේ පුද්ගලයින් තිදෙනෙකු අත්අඩංගුවට ගෙන ඇති අතර තවත් කිහිපදෙනෙකුට නීතිමය පියවර ගෙන තිබෙනවා.