ඔස්ට්‍රේලියාවේ ප්‍රධාන බැංකු කිහිපයක්, උද්ධමනය බලාපොරොත්තු වූ මට්ටමට වඩා ඉහළ යාම හේතුවෙන් මේ වසරේදී පොලී අනුපාත යළි ඉහළ යා හැකි බවට අනාවැකි පළ කර තිබෙනවා.

ජූලි මාසයේ උද්ධමනය 3.5%ක් ලෙස වාර්තා වී ඇති අතර, සංචිත බැංකුව වඩාත් අවධානයෙන් නිරීක්ෂණය කරන මූලික උද්ධමනය 3.6%ක් දක්වා ඉහළ ගොස් තිබෙනවා.

මේ තත්ත්වය හමුවේ NAB සැප්තැම්බර් මාසයේදීත්, Commonwealth Bank නොවැම්බර් මාසයේදීත් පොලී අනුපාත ඉහළ දැමිය හැකි බවට අනාවැකි පළ කර තිබෙනවා.

උද්ධමනය දිගටම ඉහළ මට්ටමක පැවතීම සහ ආර්ථික ක්‍රියාකාරීත්වය ශක්තිමත් වීම පොලී අනුපාත ඉහළ දැමීමේ අවදානම වැඩි කිරීමට හේතුවක් වී තිබෙන බව ආර්ථික විශ්ලේෂකයන් පවසනවා.

පොලී අනුපාත යළි ඉහළ ගියහොත් නිවාස ණය ගෙවන පවුල්වල මාසික ගෙවීම් වැඩි විය හැකි අතර, දැනටමත් ජීවන වියදම් පීඩනයකට මුහුණ දෙන ජනතාවට එය තවදුරටත් බලපෑ හැකි බව සඳහන්.

කෙසේ වෙතත්, පොලී අනුපාත සම්බන්ධයෙන් අවසන් තීරණයක් තවමත් ගෙන නොමැති අතර, ඉදිරි ආර්ථික දත්ත සලකා බැලීමෙන් පසුව සංචිත බැංකුව තීරණය කිරීමට නියමිතයි.

මේ අතර NAB සහ Commonwealth Bank ඇතුළු ප්‍රධාන බැංකු තම කලින් අනාවැකි වෙනස් කරමින් පොලී අනුපාත යළි ඉහළ යා හැකි බව පැවසීමත් සමඟ, ණය ලබාගෙන සිටින ඔස්ට්‍රේලියානුවන් අතර මේ පිළිබඳ අවධානය යළිත් වැඩි වී තිබෙනවා.