ඔස්ට්‍රේලියාවේ ප්‍රධාන වෙළඳ ජාලයක් වන Kmartහි අතිදැවැන්ත ලාභයට සහ සාර්ථකත්වයට මඟ පෑදූ Anko සපයනු ලබන නිෂ්පාදන මාදිලිය Officeworks සහ Bunnings යන ආයතන වෙත ද ව්‍යාප්ත කිරීමට එහි මව් සමාගම වන Wesfarmers පියවර ගෙන තිබෙනවා.

Wesfarmersහි ප්‍රධාන විධායක නිලධාරී Rob Scott සඳහන් කළේ, Kmartහි නිෂ්පාදනවලින් 85%ක් පමණ සපයන Anko සෘජු සැපයුම් සහ පෞද්ගලික සන්නාම (private label) ක්‍රමවේදය හරහා පාරිභෝගිකයන්ට ගුණාත්මක නිෂ්පාදන වඩාත් අඩු මිලට ලබා දීමට හැකි වූ බවයි.

මෙම සාර්ථක අත්දැකීම Officeworksහි ඉදිරි නිෂ්පාදන සඳහා ද යොදා ගන්නා අතර, Bunningsහි තෝරාගත් නිෂ්පාදන සඳහා ද මෙම ක්‍රමවේදය සහ ඒ හා සමාන දැනුම භාවිත කිරීමට නියමිතයි.

කෙසේවෙතත්, 2026 මුල්‍ය වර්ෂයේදී Wesfarmers සමාගමේ මුළු ලාභය 1.8%කින් පහළ ගොස් ඇති අතර Officeworksහි ඉපැයීම් 22.2%කින් පහත වැටී තිබෙනවා.

මෙම අඩුවීමට හේතුවී ඇත්තේ Officeworksහි මෙම නව Anko මාදිලියට පරිවර්තනය වීම සඳහා දැරීමට සිදු වූ එක්වරක් සිදුකළ පරිවර්තන පිරිවැය (transformation costs) බවයි සමාගම පෙන්වා දෙන්නේ.

එහෙත් Officeworksහි මුළු ආදායම 3.7%කින් ඉහළ ගොස් ඩොලර් බිලියන 3.7ක් දක්වා වර්ධනය වී තිබෙනවා.

මෙම නව වෙනස්කම් හරහා පිරිවැය අඩුකරගනිමින් ඉදිරියටත් පාරිභෝගිකයන්ට අඩුම මිල ගණන් යටතේ භාණ්ඩ ලබාදීමට බලාපොරොත්තු වන බව Rob Scott වැඩිදුරටත් සඳහන් කළා.