Melbourne සහ Sydney මෙවර වාර්තාගත උණුසුම්ම ශීත සම අත්විඳ ඇති අතර, ඉදිරියේදී එළඹෙන වසන්ත සමයත් ඉහළ උෂ්ණත්වයක් සහිත විය හැකි බව කාලගුණ විශේෂඥයන් පවසනවා.

Bureau of Meteorology දත්ත අනුව Melbourne හි මෙම ශීත සමයේ සාමාන්‍ය උෂ්ණත්වය සෙල්සියස් අංශක 12යි දශම 2ක් ලෙස වාර්තා වී ඇති අතර, එය මෙතෙක් වාර්තා වූ ඉහළම ශීත උෂ්ණත්වයයි.

වසන්ත සමයේ ආරම්භයත් සමඟ Melbourne ඇතුළු දකුණු-නැගෙනහිර ප්‍රදේශවල උෂ්ණත්වය සාමාන්‍යයට වඩා සෙල්සියස් අංශක 5ක් පමණ ඉහළ යා හැකි බව අනාවැකි පළ වී තිබෙනවා.

ඒ අනුව සැප්තැම්බර් පළමු වැනිදා Melbourne සහ Adelaide නගරවල උෂ්ණත්වය සෙල්සියස් අංශක 22ක් පමණ දක්වා ඉහළ යා හැකි අතර, Sydney හි එය අංශක 25ත් 27ත් අතර විය හැකි බව සඳහන්.

කාලගුණ ආකෘති අනුව ඉදිරි මාස තුන තුළ දකුණු ඔස්ට්‍රේලියාවේ උෂ්ණත්වය වාර්තාගත මට්ටමකට ළඟා විය හැකි බවටද අනාවැකි පළ කර තිබෙනවා.

මෙම අසාමාන්‍ය උණුසුම් තත්ත්වයට ස්වාභාවික කාලගුණ වෙනස්වීම්, දේශගුණික විපර්යාස සහ ප්‍රබල එල් නීනෝ තත්ත්වයක් ඇතුළු කරුණු බලපාන බව කාලගුණ විශේෂඥයන් පෙන්වා දෙනවා.

ඒ අනුව Melbourne ඇතුළු දකුණු-නැගෙනහිර ප්‍රදේශවල ඉදිරි වසන්ත සමය සාමාන්‍යයට වඩා උණුසුම් විය හැකි බැවින්, කාලගුණ තත්ත්වය පිළිබඳ අවධානයෙන් සිටින ලෙස ජනතාවට උපදෙස් ලැබී තිබෙනවා.