නිව් සවුත් වේල්ස් (NSW) ප්‍රාන්ත අගමැති Chris Minns සිය ප්‍රථම නිල ඉන්දීය වෙළඳ චාරිකාව ආරම්භ කර තිබෙනවා.

එහි පළමු පියවර ලෙස අගමැතිවරයා නවදිල්ලියේ පිහිටි Asha ප්‍රජා මධ්‍යස්ථානයේ නිරීක්ෂණයක නිරත වුණා.

එහිදී අතිශය දුෂ්කර ජීවන තත්ත්වයන් යටතේ හැදී වැඩෙන දරුවන් හමුවූ අගමැතිවරයා, ඔවුන් සමඟ වීදි ක්‍රිකට් ක්‍රීඩාවේ ද යෙදුණු බවයි වාර්තා වන්නේ.

මෙම අවස්ථාවේදී Asha සංවිධානයේ සහයෙන් ලබන වසරේදී සිඩ්නි විශ්වවිද්‍යාලයේ ශාස්ත්‍රපති උපාධිය හැදෑරීමට වරම් ලැබූ 22 හැවිරිදි Madhu නමැති තරුණිය ද අගමැතිවරයා හමුවුණා.

ඇය සඳහන් කළේ ඔස්ට්‍රේලියාවේ උසස් අධ්‍යාපනය ලැබීමට ලැබෙන මෙම අවස්ථාව තමාගේ සහ තම පවුලේ අනාගතය සම්පූර්ණයෙන්ම වෙනස් කරන බවයි.

මේ අතර, නිව් සවුත් වේල්ස් අගමැතිවරයා සහ භාණ්ඩාගාරික Daniel Mookhey විසින් Western Sydney Universityහි නවතම ඉන්දීය මණ්ඩපය උත්තර ප්‍රදේශ්හිදී නිල වශයෙන් විවෘත කරනු ලැබුවා.

ලබන වසරේ පෙබරවාරි මාසයේ සිට සිසුන් ඇතුළත් කරගැනීමට නියමිත මෙම විශ්වවිද්‍යාලය හරහා කෘෂිකාර්මික තාක්ෂණය, තිරසාරභාවය සහ ව්‍යාපාර කළමනාකරණය වැනි ක්ෂේත්‍ර කෙරෙහි වැඩි අවධානයක් යොමු කිරීමට නියමිතයි.

කෙසේ වෙතත්, ඔස්ට්‍රේලියානු රජය මඟින් හඳුන්වා දීමට නියමිත නව ආගමන විගමන සීමා කිරීම් හේතුවෙන් විදේශීය සිසුන් ඇතුළත් කරගැනීමට බාධා එල්ල විය හැකි බවට Western Sydney Universityහි උපකුලපති George Williams අනතුරු අඟවා සිටිනවා.

විදේශීය සිසුන් සංඛ්‍යාව අඩු කිරීම මඟින් ඔස්ට්‍රේලියාවේ සෞඛ්‍ය, වැඩිහිටි සත්කාර සහ ඉදි කිරීම් ක්ෂේත්‍රවලට මෙන්ම ප්‍රාන්ත ආර්ථිකයට ද දැඩි බලපෑමක් එල්ල වන බවයි ඔහු වැඩිදුරටත් පෙන්වා දුන්නේ.

නිව් සවුත් වේල්ස් ප්‍රාන්තයේ දෙවන විශාලතම අපනයන කර්මාන්තය වන්නේ ජාත්‍යන්තර අධ්‍යාපනයයි.

එබැවින් ඔස්ට්‍රේලියාව සැමවිටම විදේශීය සිසුන්ට විවෘත සහ සුහදශීලී රටක් ලෙස පවත්වාගෙන යා යුතු බවයි අගමැති Chris Minns මෙහිදී අවධාරණය කළේ.