ඔස්ට්‍රේලියානු රජය වසර පහක් තුළ නව නිවාස මිලියන 1.2ක් ඉදිකිරීමට තබා ඇති නිවාස ඉලක්කය, ඉදිකිරීම් සේවක හිඟය නිසා සපුරාගැනීමට නොහැකි වනු ඇතැයි ක්ෂේත්‍රයේ ප්‍රධානීන් අනතුරු අඟවනවා.

නිවාස කර්මාන්ත සංගමය පවසන්නේ විදේශීය පුහුණු ශ්‍රමිකයන්ගේ වීසා අයදුම්පත් සලකා බැලීමේ ප්‍රමාදය නිසා ඉදිකිරීම් සමාගම්වලට අවශ්‍ය සේවකයන් ලබාගැනීම අසීරු වී ඇති බවයි.

Western Australia හි ඉදිකිරීම් සමාගමක් බඳවාගැනීමට සැලසුම් කළ විදේශීය සේවකයන් අටදෙනකුගේ වීසා සඳහා වසරකට වැඩි කාලයක් බලා සිටින බවද උදාහරණයක් ලෙස සඳහන් කර තිබෙනවා.

Master Builders Australia ඇස්තමේන්තු කරන්නේ රටේ නිවාස ඉදිකිරීම් සඳහා සේවකයන් 116,000ක පමණ හිඟයක් සහ පුළුල් යටිතල පහසුකම් ව්‍යාපෘති සඳහා සේවකයන් 300,000ක පමණ හිඟයක් පවතින බවයි.

Queensland ප්‍රාන්තයට පමණක් 2028 වනවිට ඉදිකිරීම් සේවකයන් 46,000ක් දක්වා හිඟ විය හැකි අතර, Brisbane 2032 ඔලිම්පික් උළෙලට අදාළ නව ක්‍රීඩාංගණ සහ යටිතල පහසුකම් ව්‍යාපෘති හේතුවෙන් ඉල්ලුම තවත් වැඩිවනු ඇති බවයි අපේක්ෂා කරන්නේ.

ට්‍රක් රථ රියදුරන්, කොන්ක්‍රීට් කම්කරුවන්, ගල්කොරි කම්කරුවන් සහ වෙනත් පුහුණු සේවකයන්ගේ හිඟය නිවාස ඉදිකිරීම පමණක් නොව ප්‍රවාහන සහ සැපයුම් ක්‍රියාවලියටද බලපාමින් ඇති බව සිවිල් කොන්ත්‍රාත්කරුවන්ගේ සම්මේලනය පෙන්වා දෙනවා.

දේශීය පුහුණුව වැඩි කිරීම සමඟ විදේශීය පුහුණු සේවකයන්ට වීසා ලබාදීම වේගවත් නොකළහොත් නිවාස ඉදිකිරීම ප්‍රමාද වී පිරිවැය සහ නිවාස මිල තවත් වැඩිවිය හැකි බවයි කර්මාන්ත නියෝජිතයන් පවසන්නේ.