බ්‍රිතාන්‍යයෙන් ඔස්ට්‍රේලියාවට පැමිණ වෛද්‍ය අධ්‍යාපනය ලබමින් සිටි 32 හැවිරිදි Faraz Mahboob, ලිංගික සේවිකාවන් දෙදෙනකු දූෂණය කිරීමේ චෝදනාවලට වරද පිළිගැනීමෙන් පසු රටින් පිටුවහල් කර තිබෙනවා.

ඔහු එක් කාන්තාවකට ඩොලර් 2,000 බැගින් ගෙවන බවට එකඟ වී, අනාරක්ෂිත ලිංගික සබඳතා සඳහා ඔවුන්ගේ කැමැත්ත ලබාගෙන තිබූ බවයි අධිකරණයේදී අනාවරණය වී ඇත්තේ.

කෙසේවෙතත්, මුදල් ගෙවූ බව පෙන්වීම සඳහා Commonwealth Bank නමින් ව්‍යාජ ගනුදෙනු රිසිට්පත් ඉදිරිපත් කළ ඔහු, ව්‍යාජ ලිංගික රෝග පරීක්ෂණ වාර්තාද කාන්තාවන්ට පෙන්වා තිබෙනවා.

ලිංගික සේවය ලබාගැනීමෙන් පසුව ඔහු පොරොන්දු වූ මුදල් නොගෙවා, එම කාන්තාවන් දෙදෙනාගේ දුරකථන අංක සහ සමාජ මාධ්‍ය ගිණුම් අවහිර කර ඇති බවද වාර්තා වෙනවා.

පසුව ඔහු නැවතත් එම සිදුවීම්වලට සම්බන්ධ Sydney හෝටලයට පැමිණි අවස්ථාවේදී, 2025 ජනවාරි මාසයේදී පොලිසිය විසින් අත්අඩංගුවට ගෙන තිබුණා.

එවකට ඔහු Sydney හි Royal Prince Alfred Hospital හි සායනික පුහුණුවක නිරතව සිටි අතර, අධිකරණය ඔහුට වසර දෙකයි මාස හයක සිරදඬුවමක් සහ වසරයි මාස පහක ඇප නොලැබෙන කාලයක් නියම කළා.

අත්අඩංගුවට ගත් දිනයේ සිට සිරදඬුවම ගණනය කිරීම හේතුවෙන් 2026 ජූනි මාසයේදී ඔහුට නිදහස ලැබුණු අතර, ඉන් අනතුරුව සංක්‍රමණ බලධාරීන් විසින් ඔස්ට්‍රේලියාවෙන් පිටුවහල් කර තිබෙනවා.

මෙම නඩුව 2022දී New South Wales ප්‍රාන්තයට හඳුන්වා දුන් නව කැමැත්ත පිළිබඳ නීති යටතේ විභාග වූ අතර, එකඟ වූ මුදල ගෙවීම වැනි කොන්දේසි වංචනිකව කඩ කිරීමෙන් ලබාගත් කැමැත්ත වලංගු නොවන බවයි එම නීතියෙන් පෙන්වාදී ඇත්තේ.

ඔස්ට්‍රේලියානු ප්‍රජාව අපරාධ සිදුකරන විදේශිකයින්ගෙන් ආරක්ෂා කිරීම තම දෙපාර්තමේන්තුවේ ප්‍රමුඛ වගකීමක් බව ස්වදේශ කටයුතු දෙපාර්තමේන්තුව සඳහන් කරනවා.