නත්තල් සමය සඳහා පවුල් සාමාන්‍යයෙන් මිලදී ගන්නා මස්, පාන් සහ බේකරි නිෂ්පාදන ඇතුළු ආහාර ද්‍රව්‍ය රැසක මිල ඉදිරි මාසවලදී ඉහළ යා හැකි බවට ඔස්ට්‍රේලියානු පාරිභෝගිකයින්ට අනතුරු අඟවා තිබෙනවා.

විශේෂයෙන් Christmas ham, හරක් මස් සහ බැටළු මස්වලින් සකස් කරන roast වැනි උත්සව කෑම සඳහා භාවිත කරන මස් වර්ගවල මිල ඉහළ යාමේ වැඩි අවදානමක් පවතින බවයි වාර්තා වන්නේ.

සත්ව ආහාර සඳහා භාවිත කරන ධාන්‍ය මිල වැඩිවීම, මස් ශීත කර ගබඩා කිරීමේ වියදම් සහ ශීතාගාර සහිත ප්‍රවාහන සේවාවල වියදම් ඉහළ යාම මස් මිල වැඩිවීමට ප්‍රධාන වශයෙන් බලපා තිබෙනවා.

මේ අතර සීනි සහ පිටි මිල ඉහළ ගියහොත් එම අමුද්‍රව්‍ය භාවිතයෙන් නිෂ්පාදනය කරන පාන්, කේක්, බිස්කට් සහ අනෙකුත් බේකරි ආහාරවල මිලද නත්තලට පෙර වැඩිවිය හැකියි.

ලෝක ආහාර වෙළෙඳපොළේ මිල වෙනස්වීම්, නිෂ්පාදන වියදම් සහ භාණ්ඩ ප්‍රවාහන ගාස්තු ඉහළ යාම අවසානයේ සුපිරි වෙළෙඳසල්වලදී පාරිභෝගිකයා ගෙවන මිලට එකතු විය හැකි බව විශේෂඥයින් පෙන්වා දෙනවා.

දැනටමත් නිවාස ණය, කුලී, විදුලිය සහ දෛනික ජීවන වියදම් සමඟ අරගල කරන පවුල්වලට මෙවර නත්තල් කෑම මේසය සූදානම් කිරීම සඳහා පෙර වසරවලට වඩා වැඩි මුදලක් වෙන් කිරීමට සිදුවිය හැකියි.

එබැවින් මිල ගණන් සසඳා බැලීම, විශේෂ දීමනා භාවිත කිරීම සහ දිගු කලක් තබාගත හැකි භාණ්ඩ කල්තියා මිලදී ගැනීමෙන් නත්තල් වියදම් යම් තරමකට පාලනය කරගත හැකි බවට පාරිභෝගිකයින්ට උපදෙස් ලබාදී තිබෙනවා.