තවත් සති හතරකින් පසු, එනම් ලබන ඔක්තෝබර් 4 වන ඉරිදා දින සිට ඔස්ට්‍රේලියානුවන් මිලියන 18කට ආසන්න පිරිසකගේ ඔරලෝසු වේලාවන් පැයකින් ඉදිරියට ගෙන එනවා.

ඒ සමඟ ඔස්ට්‍රේලියාවේ Daylight Saving වේලාවන් ආරම්භ වීමට නියමිතයි.

නිව් සවුත් වේල්ස්, වික්ටෝරියා, දකුණු ඔස්ට්‍රේලියාව, ටස්මේනියාව සහ ACT යන ප්‍රාන්තවල වැසියන්ට මෙම වේලාවන් වෙනස් වීම බලපාන අතර, එදින සිට ඔවුන් කාලය පැයක් ඉදිරියට ගතයුතු වනවා.

ක්වීන්ස්ලන්ඩ්, බටහිර ඔස්ට්‍රේලියාව සහ Northern Territory කලාපවල පවතින වේලාවේ කිසිදු වෙනස්වීමක් සිදුවන්නේ නැහැ.

මේ හේතුවෙන් මුළු ඔස්ට්‍රේලියානු මහද්වීපය ප්‍රධාන Time Zones 5කට බෙදී යනවා.

කෙසේ වෙතත්, මෙම ක්‍රමවේදය සම්බන්ධයෙන් ඔස්ට්‍රේලියානු ජනතාව අතර දැඩි මතභේදයක් මතුව තිබෙනවා.

සිදු කරන ලද ජනමත විචාරණයකට අනුව, සියයට 50ක පිරිසක් මෙම වේලාවන් වෙනස් කිරීමට අකමැති බව ප්‍රකාශ කර ඇති අතර, ඊට කැමැත්ත පළ කර ඇත්තේ සියයට 37ක පිරිසක් පමණයි.

මේ අතර සෞඛ්‍ය විශේෂඥයින් පෙන්වා දෙන්නේ, පැයක් ඉදිරියට තැබීම නිසා ජනතාවගේ නින්ද ලබාගැනීමේ රටාවන්ට බාධා පැමිණෙන අතර, ඉන් හෘදයාබාධ සහ රථවාහන අනතුරු වැඩිවීමේ අවදානමක් ද පවතින බවයි.

කෙසේ වෙතත්, Smartphones සහ Computersවල වේලාවන් automatically වෙනස් වුවද, සාමාන්‍ය ඔරලෝසු භාවිතා කරන පිරිස් ඔක්තෝබර් 04 වනදා උදෑසන සිය ඔරලෝසු පැයක් ඉදිරියට තැබීමට මතක තබාගත යුතු වනවා.