ඔස්ට්‍රේලියානු කාන්තාවන් මාතෘත්වය ලැබීමේ සාමාන්‍ය වයස අවුරුදු 32 දක්වා ඉහළ ගොස් ඇති අතර, වයස අවුරුදු 40දී ළදරුවන් සිටින කාන්තාවන්ගේ සංඛ්‍යාව ද පසුගිය දශක කිහිපය තුළ දෙගුණයකටත් වඩා වැඩි වී තිබෙනවා.

මෙම තත්ත්වයත් සමඟ තරුණ වියේදීම තම ඩිම්බ ශීතකරණය කර සංරක්ෂණය කිරීමට (Egg Freezing) කාන්තාවන් වැඩි වශයෙන් යොමුවීමේ නව ප්‍රවණතාවක් මතුව ඇති බවයි වාර්තා වන්නේ.

වෘත්තීය සහ ආර්ථිකමය කාරණා මෙන්ම සුදුසු සහකරුවෙකු සොයාගැනීමේ ප්‍රමාදය හේතුවෙන් බොහෝ කාන්තාවන් දරුවන් ලැබීම පසුකාලීනව සිදුකිරීමට තීරණය කරනවා.

ඩිම්බ සංරක්ෂණය කිරීම මගින් තරුණ වියේ පවතින උසස් ගුණාත්මකභාවයෙන් යුතු ඩිම්බ අනාගතය වෙනුවෙන් සුරක්ෂිතව තබාගැනීමේ හැකියාව ලැබෙනවා.

මේ සම්බන්ධයෙන් අදහස් දක්වන සෞඛ්‍ය විශේෂඥයින් පෙන්වා දෙන්නේ මෙහිදී වඩා වැදගත් වන්නේ “ඩිම්බ ලබාගන්නා අවස්ථාවේ කාන්තාවගේ වයස” බවයි.

පසුව දරුවෙකු ලබා ගැනීමට උත්සාහ කරන විට වැදගත් වන්නේ ඩිම්බ සංරක්ෂණය කළ අවස්ථාවේ පැවති වයස වන අතර වයසින් අඩු තරමට ඩිම්බවල ගුණාත්මකභාවය වැඩි වනවා.

අවුරුදු 35ක කාන්තාවකට පසුකාලීනව සාර්ථක ලෙස දරුවෙකු ලබාගැනීමේ 90%ක සම්භාවිතාවක් ලබාගැනීමට ඩිම්බ 20ක් පමණ සංරක්ෂණය කිරීමට සිදු වන බවයි විශේෂඥයින් පවසන්නේ.

මෙම ඩිම්බ දශක ගණනාවක් වුවද ශීත කර තැබිය හැකි වුවත්, වෛද්‍යවරුන් උපදෙස් දෙන්නේ වැඩිහිටි වියේදී ගැබ්ගැනීමේදී මතුවන සෞඛ්‍ය අවදානම් අවම කරගැනීමට හැකි ඉක්මනින් දරුවන් ලබාගැනීමට යොමුවන ලෙසයි.

කෙසේ වෙතත්, ඩිම්බ සංරක්ෂණය කිරීම මගින් අනාගතයේදී දරුවෙකු ලැබීමේ හොඳ අවස්ථාවක් හිමිවන නමුත්, එය 100%ක සහතිකයක් නොවන බව ද විශේෂඥයින් වැඩිදුරටත් අවධාරණය කරනවා.