ඔස්ට්‍රේලියාවේ ශීඝ්‍රයෙන් වර්ධනය වන නීති විරෝධී දුම්කොළ හා Vape වෙළඳපොළ සහ සංවිධානාත්මක අපරාධ මර්ධනය කිරීම සඳහා විපක්ෂ නායක Angus Taylor විසින් ආන්දෝලනාත්මක යෝජනාවලියක් ඉදිරිපත් කර තිබෙනවා.

ඔස්ට්‍රේලියාවේ වත්මන් දුම්කොළ ප්‍රතිපත්තිය සම්පූර්ණයෙන්ම අසාර්ථක වී ඇති අතර එය සංවිධානාත්මක අපරාධකරුවන්ට විශාල ලෙස ආදායම් උපයා ගැනීමට මග පාදා දී ඇති බවයි විපක්ෂ නායකවරයා පවසන්නේ.

මේ වන විට ඔස්ට්‍රේලියාව තුළ $10ත් $15ත් අතර වැනි ඉතා අඩු මුදලකට නීති විරෝධී සිගරට් පැකට්ටුවක් ලබා ගැනීමට හැකි වී තිබීම නිසා රජයේ පාලන මිල ගණන් අභියෝගයට ලක්වී ඇති බව ස ඔහු පෙන්වා දෙනවා.

මෙමගින් උපයන මුදල් නීති විරෝධී ගිනි තැබීම්, පහරදීම් සහ විවිධ අපරාධ සඳහා යොදවන බව පෙන්වා දෙන විපක්ෂය, එම අපරාධ රැල්ල මැඩපැවැත්වීම සඳහා ප්‍රධාන යෝජනා කිහිපයක් ඉදිරිපත් කර තිබෙනවා.

දුම්කොළ නිෂ්පාදන සඳහා අයකරන බද්ද (Tobacco Excise) 80% කින් පහත හෙලීම, Vape සහ Nicotine Pouches නීතිගත කිරීම සහ නියාමනය කිරීම ඉන් කිහිපයක්.

නීති විරෝධී ජාවාරම්කරුවන් වැටලීමට ඩොලර් මිලියන 200ක විශේෂ ප්‍රතිපාදන වෙන්කිරීම ද යෝජනා කර තිබෙනවා.

කෙසේ වෙතත්, සෞඛ්‍ය ක්ෂේත්‍රයේ විශේෂඥයින් මෙම යෝජනාවලියට දැඩි ලෙස විරෝධය පළ කරනවා.

වේප් නීතිගත කිරීම සහ සිගරට් මිල අඩු කිරීම මගින් ඔස්ට්‍රේලියාව තුළ දුම්පානය අවම කිරීමට වසර ගණනාවක් පුරා ගෙන ගිය වැඩපිළිවෙල ආපසු හැරවිය හැකි බවයි ඔවුන් පෙන්වා දෙන්නේ.