ඉන්ධන මිල ඉහළ යාම සහ මැදපෙරදිග පවතින ගැටුම්කාරී තත්ත්වය හේතුවෙන් ඔස්ට්‍රේලියානුවන්ගේ විදේශ සහ දේශීය ගමන් බිමන් පසුගිය කාලයේදී අඩුවී තිබෙන බව නව දත්තවලින් හෙළි වී තිබෙනවා.

විශේෂයෙන් උතුරු අර්ධගෝලයේ ගිම්හාන සමයේ විදේශ සංචාර සඳහා ඔස්ට්‍රේලියාවෙන් පිටත්ව ගිය පුද්ගලයන්ගේ සංඛ්‍යාව කොවිඩ් වසංගතයෙන් පසු පළමු වතාවට අඩුවී ඇති බවයි ඔස්ට්‍රේලියානු සංඛ්‍යාලේඛන කාර්යාංශය සඳහන් කළේ.

ඒ සමඟම විදේශ සංචාර සඳහා ද ඔස්ට්‍රේලියානුවන් වැය කළ මුදලද අඩුවී ඇති අතර, ගුවන් ගමන් සඳහා වැයවන ඉන්ධන මිල ඉහළ යාම සහ ලෝකයේ පවතින අවිනිශ්චිත තත්ත්වය ඒ සඳහා බලපා ඇති බව සඳහන් වෙනවා.

ජුනි කාර්තුවේදී විදේශයන්ගෙන් ලබාගත් සංචාරක සේවා සඳහා කරන වියදම සියයට 4.9කින් අඩුවී තිබෙන අතර, ඒ අතර දේශීය ගමන් බිමන් සඳහාද ඔවුන්ගේ වියදම් පහළ ගොස් තිබෙනවා.

ඒ වෙනුවට ඉහළ ඉන්ධන වියදම් හමුවේ දිගුකාලීනව වියදම් අඩු කරගැනීමේ අරමුණින් Electric සහ Hybrid වාහන මිලදී ගැනීමට ඇතැම් පවුල් වැඩි අවධානයක් යොමු කර ඇති බව දත්තවලින් පෙනී යනවා.

ඒ අනුව විදේශ සංචාර සඳහා වියදම් කරනවා වෙනුවට සියලුම ඔස්ට්‍රේලියානුවන් වාහන මිලදී ගැනීමට යොමුවී ඇති බවක් නොපෙනුණත්, ඉහළ ඉන්ධන මිල සහ ජාත්‍යන්තර තත්ත්වයන් නිසා පවුල්වල ගමන් බිමන් සහ වියදම් තීරණවල යම් වෙනසක් සිදුවී තිබෙනවා.

මෙම තත්ත්වයත් සමඟ ඉදිරියේදී ගුවන් ගමන් සහ විදේශ සංචාර සඳහා ඇති ඉල්ලුමට තවදුරටත් බලපෑම් ඇති වේද යන්න පිළිබඳව සංචාරක ක්ෂේත්‍රයේ අවධානය යොමුවී ඇති අතර, ජීවන වියදම සහ ඉන්ධන මිල ඔස්ට්‍රේලියානුවන්ගේ සංචාර තීරණවලට බලපාන ප්‍රධාන කරුණු බවට පත්වෙමින් තිබෙනවා.