ගෘහ නිර්මාණ ශිල්පියෙකු වීමට පැමිණි තරුණයා අද ඔස්ට්‍රේලියාවේ සාර්ථක ශ්‍රී ලාංකික Chef කෙනෙක්

ඔස්ට්‍රේලියාවේ ශ්‍රී ලාංකික ප්‍රජාව අතර තමන්ගේම නමක් ගොඩනගාගත් Chef සහ ව්‍යාපාරිකයෙකු ලෙස යසිරු දැසමන් අද බොහෝ දෙනෙකුගේ අවධානය දිනාගෙන සිටිනවා.

ගෘහ නිර්මාණ ශිල්පියෙකු (Architect) වීමේ සිහිනයක් සමඟ 2008 වසරේදී ඔස්ට්‍රේලියාවට පැමිණි යසිරුගේ ජීවිත ගමන, අනපේක්ෂිත ලෙස ආහාර කලාව දෙසට හැරුණත්, අද වන විට එය සාර්ථක ව්‍යාපාරික ගමනක් බවට පත්ව තිබෙනවා.

නුගේගොඩින් ආරම්භ වූ ඔහුගේ අධ්‍යාපනික ගමන ශාන්ත ජෝන් විද්‍යාලයෙන් සහ පසුව කොළඹ අශෝක විද්‍යාලයෙන් ඉදිරියට ගියා. උසස් පෙළෙන් පසුව Draftsman කෙනෙකු ලෙස වෘත්තීය ජීවිතය ආරම්භ කළ යසිරු, Quantity Surveying සහ Civil Engineering ක්ෂේත්‍රයන්හිද අධ්‍යාපනය හදාරමින් ශ්‍රී ලංකාවේ ප්‍රමුඛ පෙළේ ඉදිකිරීම් සමාගමක් වන ICC සමාගම සමඟ වසර අටකට ආසන්න කාලයක් සේවය කළා.

ඒත් ඔහුගේ සිහිනය වූයේ Architecture ක්ෂේත්‍රයේ ඉදිරියට යාමයි. ඒ අරමුණින් ඔස්ට්‍රේලියාවට පැමිණ Swinburne University හි Architecture අධ්‍යාපනය ආරම්භ කළත්, අධ්‍යාපන වියදම් පියවා ගැනීම සඳහා Glen Waverley හි Shine Cafe Bar & Lounge හි Kitchen Hand කෙනෙකු ලෙස අර්ධකාලීන රැකියාවක් ආරම්භ කළා.

එම රැකියාව ඔහුගේ ජීවිතයේ හැරවුම් ලක්ෂ්‍යය බවට පත්වුණා.

එහිදී ප්‍රවීණ Chefවරුන් සමඟ වැඩ කිරීමෙන් ලැබුණු අත්දැකීම් සහ ආහාර සකස් කිරීමේ කලාව පිළිබඳ ඇති වූ ආශාව හේතුවෙන්, යසිරු තම වෘත්තීය දිශාව සම්පූර්ණයෙන්ම වෙනස් කිරීමට තීරණය කළා.

ඉන් අනතුරුව Holmesglen Institute හි waverley campus එකට පුර්ණ කාලිනව Diploma in Hospitality Management (Culinary )අධ්‍යාපනය හැදෑරූ ඔහු, විශේෂයෙන් French Cuisine පිළිබඳ දැනුම වර්ධනය කරගත්තා. පසුව Charles Sturt University හරහා Hotel Management සහ Business Management උපාධියද සම්පූර්ණ කරමින්, අධ්‍යාපනය සහ වෘත්තීය අත්දැකීම් එකට ගොඩනගා ගත්තා.

අධ්‍යාපනය අවසන්ව Shine Cafe සේවා ස්ථානයේම Chef කෙනෙකු ලෙස මුලික අඩිතාලම ගෙන වසර 5 සේවයෙන් පසුව එම හොටල් සමුහයේම Glen Waverley හි ප්‍රසිද්ධ ශ්‍රී ලාංකික අවන්හලක් වන Elephant Corridor සමඟ එක්වූ යසිරු, ඔවුන් සමග වසර දහයකට ආසන්න කාලයක් සේවය කරමින් තම කුසලතා තවදුරටත් වර්ධනය කරගත්තා.

French, Indian, Sri Lankan සහ Middle Eastern ආහාර සම්ප්‍රදායන් පිළිබඳ විශේෂ දැනුමක් ඇති ඔහු, Italian, Japanese, Mexican, Chinese සහ Indo-Chinese Cuisine පිළිබඳද පුළුල් අත්දැකීම් ලබාගෙන තිබෙනවා.

2018 වසරේදී තමන්ගේම ව්‍යාපාරික ගමන ආරම්භ කළ යසිරු, Dandenong Workers Club හි විශාල Restaurant එකක් ආරම්භ කළා. එකවර පුද්ගලයින් 300කට පමණ සේවා සැපයිය හැකි එම ස්ථානය වසර පහකට ආසන්න කාලයක් සාර්ථකව පවත්වාගෙන ගියා.

මේ වන විට Noble Park ප්‍රදේශයේ Takeaway ආහාර ව්‍යාපාරයක් සාර්ථකව පවත්වාගෙන යන අතර, ඉදිරියේදී නොබෝ දිනකින් Pakenham ප්‍රදේශයේ නව ව්‍යාපාරික ස්ථානයක් විවෘත කිරීමටද සූදානම් වෙමින් සිටිනවා.

වසර 18කට ආසන්න කාලයක් ඔස්ට්‍රේලියාවේ Chef කෙනෙකු ලෙස කටයුතු කළ යසිරු දැසමන්ගේ ජීවිත ගමන, සිහින වෙනස් වුවත් උත්සාහය, කැපවීම සහ අඛණ්ඩ ඉගෙනීම තුළින් සාර්ථකත්වය ගොඩනගා ගත හැකි බව පෙන්වා දෙන ප්‍රබල උදාහරණයක්.

ඔහුගේ ජීවිතයෙන් ලැබෙන වැදගත්ම පණිවිඩය වන්නේ,

“තමන් කැමති දේ හඳුනාගෙන ඒ වෙනුවෙන් කැපවීමෙන් වැඩ කරන්න. ජීවිතයේ සැලසුම් වෙනස් වුණත්, උත්සාහය කිසිදා අත්හරින්න එපා.”

ඔස්ට්‍රේලියාවේ නව ජීවිතයක් ආරම්භ කරන ශ්‍රී ලාංකිකයන්ට, යසිරු දැසමන්ගේ කතාව සාර්ථකත්වය කරා යා හැකි බව පෙන්වන ආශ්වාදජනක ජීවිත ගමනක් ලෙස සැලකිය හැකිය.