මෙල්බන්හි Point Cook ප්‍රදේශයේ සිය නිවස තුළ වයස අවුරුදු 60 ගණන්වල Indonesian කාන්තාවක් වහලියක ලෙස රඳවාගෙන සිටි Chee Kit Chongට වසර හයක සිරදඬුවමක් නියම කර තිබෙනවා.

47 හැවිරිදි Malaysian ජාතික Chee Kit Chongට වසර හතරක් සම්පූර්ණ වනතුරු නිදහස් වීමට අවස්ථාවක් නොලැබෙන අතර, ඔහු 2030දී නිදහස ලබාගැනීම සඳහා සුදුසුකම් ලබනු ඇති.

2022 පෙබරවාරි සහ ඔක්තෝබර් අතර කාලයේදී අදාළ කාන්තාවට වැටුප් නොගෙවා ගෘහ සේවයේ යොදවා, ඇයගේ ගමන් බිමන් පාලනය කරමින් ආහාර, නින්ද සහ නිසි වෛද්‍ය ප්‍රතිකාර අහිමි කළ බවයි අධිකරණයේදී හෙළිව ඇත්තේ.

නිවසේ වැඩ තමන් අපේක්ෂා කළ මට්ටමට සිදු නොකළ බව පවසමින් Chong ඇයට පහරදී ඇති අතර, ඇයගේ හිස බිත්තියකට තල්ලු කර මුහුණට පා පහර දී තිබූ බවද නඩු විභාගයේදී අනාවරණය වුණා.

ආහාර නොමැතිවීම හේතුවෙන් ප්‍රදේශයේ පුණ්‍යායතනයකින් පහසුවෙන් සඟවාගත හැකි ක්‍රැකර්ස් ඇතුළු සුළු ආහාර ඉල්ලා ගැනීමට පවා ඇයට සිදුව තිබූ බව අධිකරණයට දැනුම් දී තිබෙනවා.

2022 ඔක්තෝබර් මාසයේදී එම නිවසෙන් පිටවූ ඇය Victoria Police නිලධාරීන්ට හමුවන විට මන්දපෝෂණයෙන් පෙළෙමින්, ශරීරයේ ඉදිමීම්, කැපුම් සහ තැලීම් සහිතව සිටි බැවින් රෝහල්ගත කර තිබුණා.

වින්දිත කාන්තාව දේපළක් ලෙස සලකා ඇයගේ දුර්වලතා අමානුෂික ලෙස ප්‍රයෝජනයට ගත් බව විනිසුරුවරයා ප්‍රකාශ කර ඇති අතර, සිරදඬුවම අවසන් කිරීමෙන් පසු Chong මැලේසියාවට පිටුවහල් කිරීමට ඉඩ ඇති බවද වාර්තා වනවා.