සිඩ්නි ඇතුළු ප්‍රධාන ප්‍රදේශ කිහිපයකට බලපා ඇති අසාමාන්‍ය අධික උණුසුම් කාලගුණ තත්ත්වය හේතුවෙන් අද සිට ක්‍රියාත්මක වන පරිදි Total Fire Ban එකක් පැනවීමට නිව් සවුත් වේල්ස් ග්‍රාමීය ගිනි නිවීම් සේවය (RFS) පියවර ගෙන තිබෙනවා.

වසන්ත ඍතුව ආරම්භ වීමත් සමඟ වසර 50කට පසුව වාර්තා වූ ඉහළම උෂ්ණත්වය හමුවේ සිඩ්නිහි ඇතැම් ප්‍රදේශවල උෂ්ණත්වය සෙල්සියස් අංශක 30 දක්වා ඉහළ යනු ඇති බවටයි කාලගුණ විද්‍යාඥයින් අනාවැකි පළ කරන්නේ.

මේ හේතුවෙන් ලැව්ගිනි ඇතිවීමේ තර්ජනය දැඩි ලෙස ඉහළ ගොස් ඇති අතර, විවෘත ස්ථානවල ගිනි තැබීම් සම්පූර්ණයෙන්ම තහනම් කර තිබෙනවා.

වනාන්තර ආශ්‍රිතව ජීවත්වන ජනතාවට සිය නිවාස සහ දේපළ ආරක්ෂා කරගැනීමට අවශ්‍ය පූර්ව සූදානම් වීම් සිදුකරන ලෙසත්, අවදානම් සහිත ප්‍රදේශවලින් ආරක්ෂිත ස්ථාන වෙත මාරුවන ලෙසත් බලධාරීන් උපදෙස් දෙනවා.

වසන්තයේ පළමු සතිය අවසන් වන විට, වික්ටෝරියාව, ටස්මේනියාව, දකුණු ඔස්ට්‍රේලියාව, NSW, ACT සහ ක්වීන්ස්ලන්ඩ් පුරා උෂ්ණත්වය සාමාන්‍ය අගයට වඩා ඉහළ යනු ඇති බවටයි අනාවැකි පළ වී ඇත්තේ.

කෙසේවෙතත්, මෙම උණුසුම් කාලගුණයට හාත්පසින්ම වෙනස් ලෙස නිව් සවුත් වේල්ස් ප්‍රාන්තයේ දකුණු දිග කලාපීය ප්‍රදේශවලට අද දිනයේදී හිම පතනය විය හැකි බවට ද කාලගුණ අංශ වැඩිදුරටත් පවසනවා.