මෙල්බන්හි කනිෂ්ඨ බාලිකා පාපන්දු තරගයක් අතරමැදදී නවත්වා, පිරිමි ළමයින්ගේ කණ්ඩායමකට අදාළ ක්‍රීඩා පිටිය ලබාදීම සඳහා බාලිකා කණ්ඩායම වෙනත් බාල මට්ටමේ පිටියකට යොමු කිරීමට එරෙහිව Boroondara Eagles පාපන්දු සමාජය දැඩි විරෝධය පළ කර තිබෙනවා.

Oakleighහි Caloola Reserveහි පැවැති වයස අවුරුදු 12න් පහළ බාලිකා පාපන්දු තරගයක් අතරතුරදී මෙය සිදුවී ඇත්තේ වයස අවුරුදු 11න් පහළ පිරිමි කණ්ඩායමකට එම පිටිය ලබාදීමේ අරමුණින්.

විනාඩි 40ක ප්‍රමාදයකින් පසුව බාලිකා කණ්ඩායමට ලබාදී ඇත්තේ ජලයෙන් යටවූ, ආරක්ෂිත නොවන වෙනත් පිටියක් වන අතර, ඒ හේතුවෙන් තරගය අතහැර දැමීමට සිදුවී තිබෙනවා.

මෙම සිද්ධිය නිසා තරුණ කාන්තා පුහුණුකාරිනියක් කඳුළු සලමින් පිටියෙන් ඉවත්ව ගිය බවත්, ක්‍රීඩිකාවන් සහ දෙමාපියන් දැඩි කලකිරීමට පත්වූ බවත් Boroondara Eagles සමාජය සඳහන් කරනවා.

මෙම ලිංගික වෙනස්කම් කිරීමට විරෝධය පාමින් අදාළ කණ්ඩායම සමග පැවැත්වීමට තිබූ නැවත සංවිධානය කළ තරගයට සහභාගී වීම ද එම ක්‍රීඩා සමාජය ප්‍රතික්ෂේප කර තිබෙනවා.

සිද්ධිය සම්බන්ධයෙන් Football Victoria ආයතනය වෙත සහ Football Australiaහි core integrity team වෙත නිල පැමිණිලි ඉදිරිපත් කර ඇති අතර, මෙය ලිංගික වෙනස්කමක් (Gender Discrimination) ලෙස සලකා විමර්ශනය කරන ලෙස ඉල්ලා සිටිනවා.

කෙසේ වෙතත් Football Victoria ආයතනය ප්‍රකාශ කළේ අදාළ සිදුවීම පිළිබඳව තම කණගාටුව පළකරන අතර, සාමාජික ආරක්ෂණ ක්‍රියාවලිය (Member Protection Process) යටතේ මේ පිළිබඳව පූර්ණ පරීක්ෂණයක් දැනටමත් ආරම්භ කර ඇති බවයි.