Melbourne නගර මධ්‍යයේ පිහිටි Fed Square, සැප්තැම්බර් 10 සහ 11 යන දිනවල පවුල්වලට සහ ක්‍රීඩා ලෝලීන්ට නොමිලේ විවෘත “Melbourne End Zone” NFL Fan Zone එකක් බවට පත්කිරීමට නියමිතයි.

මෙහිදී Fed Squareහි විශාල තිරය ඔස්සේ NFL තරග සජීවීව නැරඹීමට මෙන්ම NFL තේමාව යටතේ පැවැත්වෙන නොමිලේ විනෝදාස්වාද වැඩසටහන් සහ විවිධ ක්‍රියාකාරකම්වලට එක්වීමටද ජනතාවට අවස්ථාව හිමිවෙනවා.

සැප්තැම්බර් 10 බ්‍රහස්පතින්දා උදෑසන 10.20 සිට Seattle Seahawks සහ New England Patriots අතර තරගය සජීවීව පෙන්වන අතර, තරගයෙන් පසුව විශ්ලේෂණ, සම්මුඛ සාකච්ඡා සහ විශේෂ ආරාධිතයන් සහභාගී වන වැඩසටහනක්ද පැවැත්වෙනවා.

සැප්තැම්බර් 11 සිකුරාදා Los Angeles Rams සහ San Francisco 49ers අතර තරගය විශාල තිරය ඔස්සේ පෙන්වා, ඉන් අනතුරුව Fed Square ප්‍රධාන වේදිකාවේ සිට NFL Post Game Show එකක් සජීවීව විකාශය කිරීමට නියමිතයි.

මෙම NFL සතියට සමගාමීව අද San Francisco 49ers Gold Rush Cheerleadersගේ ප්‍රධානත්වයෙන් ලෝක වාර්තාවක් පිහිටුවීම ඉලක්ක කරගත් cheerleading නර්තන වැඩසටහනක්ද Fed Squareහි පැවැත්වෙනවා.

Melbourne Parkහි සැප්තැම්බර් 10 සිට 12 දක්වා පැවැත්වෙන NFL Kickoff Festival එකට NFL කෞතුකාගාරයක්, Flag Football තරග, විශේෂ ආරාධිතයන් සහ Peking Duk, Hot Dub Time Machine සහ Grinspoonගේ සංගීත ප්‍රසංගද ඇතුළත් වෙනවා.

MCGහි පැවැත්වෙන NFL තරගය නැරඹීමට පැමිණෙන ප්‍රේක්ෂකයන්ගෙන් 50%කට ආසන්න පිරිසක් වෙනත් ප්‍රාන්තවලින් හෝ විදේශයන්ගෙන් පැමිණෙනු ඇති බවත්, රටවල් 35කට වැඩි සංඛ්‍යාවක ක්‍රීඩා ලෝලීන් ටිකට්පත් මිලදීගෙන ඇති බවත් වික්ටෝරියා රජය පවසනවා.