බටහිර සිඩ්නිහි ජීවත් වන 34 හැවිරිදි Farhana Laffernis මවක් වීමේ සිහිනය සැබෑ කරගැනීමට ගත් උත්සාහයන් අතරතුර ගබ්සා පහකට මුහුණදීමෙන් තම ජීවිතය සම්පූර්ණයෙන්ම බිඳවැටුණු බව පවසනවා.

ඇයගේ පළමු ගබ්සාව ගැබ්ගෙන සති අටක් පමණ ගතවූ අවස්ථාවේ කොවිඩ් වසංගත සීමාවන් අතර සිදුවූ අතර, වෛද්‍ය හමුවීම් සහ ස්කෑන් පරීක්ෂණ සඳහා තම සැමියාද කැඳවාගෙන යාමට නොහැකිවීම නිසා එම වේදනාව තනිවම විඳදරා ගැනීමට ඇයට සිදුව තිබුණා.

පළමු ගබ්සා දෙකෙන් පසුව IVF ප්‍රතිකාර මගින් දියණියක බිහිකිරීමට ඇය සමත් වුවත්, පසුව සිදුවූ තවත් ගබ්සා තුනක් හේතුවෙන් දෙවැනි දරුවෙකු පිළිබඳව තිබූ බලාපොරොත්තුව අත්හැරීමට පවුලට සිදුවුණා.

ඉන්දියානු සංක්‍රමණික පවුලකින් පැවත එන Farhana පවසන්නේ ගබ්සාව පිළිබඳව විවෘතව කතා කිරීමට තම පවුල තුළ තිබූ අකමැත්ත සහ සංස්කෘතික නිහඬතාව හේතුවෙන් තම මානසික වේදනාව තවත් දරුණු වූ බවයි.

ගබ්සාව සාමාන්‍ය සිදුවීමක් ලෙස ඇතැම් පුද්ගලයන් සැලකුවද, එය තම ජීවිතයේ මුහුණදුන් බරපතළම අහිමිවීම බව පවසන ඇය, අවශ්‍ය සහයෝගය ලබාගැනීම සඳහා අවසානයේ තම පවුලේ සාමාජිකයන් සමඟ අපහසු සංවාදවලටද මුහුණදී තිබෙනවා.

නව ඔස්ට්‍රේලියානු අධ්‍යයනයකට අනුව 2022 වසරේ දරුවෙකු බිහිකළ කාන්තාවන් දසදෙනෙකුගෙන් තිදෙනෙකු මීට පෙර අවම වශයෙන් එක් ගබ්සාවකට මුහුණදී ඇති අතර, දසදෙනෙකුගෙන් එක් අයෙකු ගබ්සා දෙකකට හෝ ඊට වැඩි සංඛ්‍යාවකට මුහුණදී තිබෙනවා.

විවිධ සංස්කෘතික හා භාෂා පසුබිම්වල කාන්තාවන්ගේ අත්දැකීම් නිසි ලෙස දත්තවලට ඇතුළත් නොවන බවට විශේෂඥයන් අනතුරු අඟවන අතර, ගබ්සාවෙන් පසු සියලුම කාන්තාවන්ට මානසික සෞඛ්‍ය සහාය ඇතුළු විධිමත් සේවා ලබාදිය යුතු බවයි Farhana ඉල්ලා සිටින්නේ.