ඔස්ට්‍රේලියාවේ Aldi සුපිරි වෙළඳසැල් ජාලය මගින් ඊයේ විකිණීමට නියමිතව තිබූ ඩොලර් 22.99ක් වටිනා ‘Trellis and Net Kit’ නම් උද්‍යාන අංගය වෙළඳපොලට නිකුත් කිරීමට පැය කිහිපයකට පෙර සම්පූර්ණයෙන්ම අත්හිටුවීමට පියවර ගෙන තිබෙනවා.

ඒ, වනජීවී සුබසාධන සංවිධාන විසින් නගන ලද දැඩි විරෝධතාවය හේතුවෙන්.

වනජීවී බේරාගැනීමේ සංවිධාන පෙන්වා දෙන්නේ මෙම කිට් එකෙහි ඇති දැලෙහි හිඩැස් විශාල වැඩි නිසා ගෙවතුවලට පැමිණෙන පියාඹන වවුලන් (Flying foxes) සහ පක්ෂීන් එහි පැටලී තුවාල ලැබීමට හෝ මියයාමට වැඩි අවදානමක් පවතින බවයි.

‘Fly By Night’ සංවිධානය ඇතුළු පරිසරවේදීන් සමාජ මාධ්‍ය ඔස්සේ සහ සෘජුවම Aldi සමාගමෙන් ඉල්ලා සිටියේ අදාළ දැලෙහි හිඩැස්වල ප්‍රමාණය (Mesh size) ප්‍රකාශයට පත්කරන ලෙසයි.

මෙම චෝදනා හමුවේ Aldi සමාගම වහාම ක්‍රියාත්මක වී අදාළ භාණ්ඩය ජාතික මට්ටමින් විකිණීම අත්හිටුවා ඇති අතර, ඔවුන්ගේ නිල වෙබ් අඩවියෙන්ද ද එය ඉවත් කිරීමට කටයුතු කර තිබෙනවා.

මේ අතර වික්ටෝරියා ප්‍රාන්තය තුළ ඇදී පවතින විට 5x5mmට වඩා විශාල හිඩැස් සහිත උද්‍යාන දැල් විකිණීම නීතියෙන් තහනම් කර ඇති අතර, නිව් සවුත් වේල්ස් ප්‍රාන්තය ද වනජීවී ආරක්ෂාව උදෙසා මෙවැනි දැල් භාවිත නොකරන ලෙස උපදෙස් දී තිබෙනවා.

Big W ඇතුළු අනෙකුත් වෙළඳසැල් ජාල මෙන්ම eBay සහ Amazon වැනි අන්තර්ජාල වෙළඳපොලවල් හරහා ද මෙවැනි තහනම් දැල් අලෙවි වීම සම්බන්ධයෙන් පසුගිය කාලයේදී දැඩි කතාබහක් නිර්මාණය වී තිබුණා.