ඔස්ට්‍රේලියාවේ ගුවන් ගමන් පාලන සේවාවල බරපතළ කාර්ය මණ්ඩල හිඟයක් හේතුවෙන්, කොවිඩ් වසංගතයෙන් පසු නගර ආශ්‍රිත ගුවන් කලාපවල දක්නට නොලැබුණු විශේෂ ක්‍රියාමාර්ගයක් Airservices Australia විසින් ගෙන තිබෙනවා.

ඒ අනුව TIBA හෙවත් Traffic Information Broadcasts by Aircraft ක්‍රමය, මිනිත්තු 45 බැගින් වූ අවස්ථා දෙකක් සඳහා ක්‍රියාත්මක කිරීමටයි පියවර ගෙන ඇත්තේ.

TIBA ක්‍රමය ක්‍රියාත්මක වන විට සාමාන්‍ය ගුවන් ගමන් පාලන සේවාව සීමා වන අතර, අදාළ ගුවන් කලාපය හරහා ගමන් කරන ගුවන් නියමුවන් තම ගුවන් යානයේ පිහිටීම සහ ගමන් මාර්ගය පිළිබඳ තොරතුරු එකිනෙකාට සෘජුවම රේඩියෝ මගින් දැනුම් දිය යුතු වනවා.

මෙම තත්ත්වය Sydney, Melbourne සහ Canberra අතර ගුවන් ගමන්වලට බලපානු ඇති අතර, Brisbane වෙත සහ Brisbane සිට සිදුකරන ඇතැම් ගුවන් ගමන් ද බලපෑමට ලක්විය හැකි බව සඳහන්.

මේ හේතුවෙන් ගුවන් සමාගම් නව ගුවන් ගමන් සැලසුම් සකස් කරමින් සිටින අතර, ඇතැම් ගුවන් යානා වෙනත් මාර්ග ඔස්සේ හරවා යැවීම, ගුවන් ගමන් ප්‍රමාද කිරීම හෝ සීමා ඉවත් වනතුරු බලා සිටීම සිදුවිය හැකියි.

මේ අතර එක් ගුවන් සමාගමක් ආරක්ෂක අවදානම සැලකිල්ලට ගනිමින් TIBA ක්‍රියාත්මක ගුවන් කලාපය හරහා ගමන් කිරීම ප්‍රතික්ෂේප කර ඇති බව ද වාර්තා වනවා.

පසුගියදා නවසීලන්තයේ Queenstown සිට Sydney බලා පැමිණෙමින් තිබූ Qantas QF122 ගුවන් යානයක එන්ජිමෙන් ගිනි දැල් මතුවීමෙන් එය ක්‍රයිස්ට්චර්ච් වෙත හරවා යැවුණා.

විශේෂඥයින් සැක පළ කරන්නේ compressor stall තත්ත්වයක් මෙම සිද්ධියට හේතුව විය හැකි බවටයි.

කෙසේ වෙතත් සිද්ධියට නිශ්චිත හේතුව හඳුනාගැනීම සඳහා ඔස්ට්‍රේලියාවෙන් ඉංජිනේරු කණ්ඩායමක් ද යොමුකර තිබෙනවා.