Melbourne Airport හි වසර 56ක් පුරා භාවිත කළ පැරණි Pick-up සහ Drop-off ප්‍රදේශය වෙනස් කිරීමට ගුවන් තොටුපළ බලධාරීන් තීරණය කර තිබෙනවා.

ඒ අනුව ලබන ඔක්තෝබර් 6 වැනිදා සිට නව Pick-up සහ Drop-off ප්‍රදේශ විවෘත කිරීමට නියමිත අතර, දැනට භාවිත කරන Departures ramp එක එදින සිට මගීන් රැගෙන යාම සහ රැගෙන ඒම සඳහා භාවිත කළ නොහැකි වනු ඇති.

නව ක්‍රමය යටතේ Melbourne Airport වෙත මගීන් රැගෙන යන හෝ රැගෙන එන රියදුරන්ට Tullamarine Freeway හි Exit 19 හරහා කලින් පිටවී, ඉහළ මාර්ගය ඔස්සේ ගුවන් තොටුපළේ පර්යන්ත වෙත ළඟා වීමට සිදුවනවා.

මෙම වෙනස සිදුකරන්නේ Melbourne Airport හි ජාත්‍යන්තර පර්යන්තය තවදුරටත් පුළුල් කිරීම සඳහා අවශ්‍ය ඉඩ ලබාගැනීමේ අරමුණින් බවයි බලධාරීන් පවසන්නේ.

Melbourne Airport ප්‍රධාන විධායක නිලධාරිනී Lorie Argus සඳහන් කරන්නේ දිනකට 100,000කට වැඩි පිරිසක් ගුවන් තොටුපළ භාවිත කරන අතර, 2047 වන විට වාර්ෂික මගී සංඛ්‍යාව මිලියන 75ක් දක්වා ඉහළ යනු ඇතැයි අපේක්ෂා කරන බවයි.

නව Pick-up සහ Drop-off ප්‍රදේශය ආවරණය සහිත රථගාලක් තුළ ස්ථාපිත කර ඇති අතර, පෞද්ගලික සහ වාණිජ වාහන සඳහා වෙනම ප්‍රදේශද ලබාදීමට නියමිතයි.

එමෙන්ම මගීන්ට තමන්ව රැගෙන යාමට පැමිණෙන වාහනය එනතුරු ආවරණය සහිත ස්ථානයක රැඳී සිටීමටත්, වැසිකිළි පහසුකම් ආසන්නයේ සිටීමටත් නව සැලසුම මගින් අවස්ථාව ලැබෙන බව Melbourne Airport පවසනවා.

මේ අතර Mercer Drive ආසන්නයේ පවතින විනාඩි 60ක නොමිලේ රැඳී සිටීමේ ප්‍රදේශය තවදුරටත් ක්‍රියාත්මක වනු ඇති.

Melbourne Airport 1970 වසරේ විවෘත කළ දින සිට වසර 56ක් පුරා මගීන් Departures ramp එකෙන් බැසීමට සහ එහිදී රැගෙන යාමට හුරු වී සිටි බැවින්, නව ක්‍රමයට හුරුවීමට ජනතාවට යම් කාලයක් ගතවනු ඇති බව බලධාරීන් පවසනවා.

නව ක්‍රමය ආරම්භ වන ඔක්තෝබර් 6 වැනිදා සිට රියදුරන්ට සහ මගීන්ට සහය වීම සඳහා අමතර කාර්ය මණ්ඩලයක්ද යෙදවීමට Melbourne Airport කටයුතු කර තිබෙනවා.

ඒ අනුව ඔක්තෝබර් 6 වැනිදා සිට Melbourne Airport වෙත මගීන් රැගෙන යාමට හෝ රැගෙන ඒමට බලාපොරොත්තු වන රියදුරන් නව මාර්ග සහ Pick-up/Drop-off ප්‍රදේශ පිළිබඳව කලින් දැනුවත් වී ගමන් කිරීම වැදගත් වනු ඇති.