ක්වීන්ස්ලන්ඩ් ප්‍රාන්තයේ හටගත් විශාල ලැව්ගින්නක් හේතුවෙන් බ්‍රිස්බන්හි බටහිරින් පිහිටි ප්‍රධාන මහා මාර්ගයක ගමනාගමන කටයුතුවලට දැඩි බාධා එල්ල වී තිබෙනවා.

Lockyer Valley ආශ්‍රිතව හටගත් මෙම ලැව්ගින්න හේතුවෙන් Brisbane සහ Toowoomba පිහිටි Warrego මාර්ගය දෙපසටම වසා දැමීමට බලධාරීන් පියවර ගත් අතර, ප්‍රදේශයේ නිවාස 20කට ආසන්න සංඛ්‍යාවක් අවදානම් තත්ත්වයට පත් වුණා.

ගිනි නිවන රථ 26ක් සහ ගුවන් මගින් ජලය හෙළන යානා යොදාගනිමින් ගින්න පාලනය කිරීමට උත්සාහ කළද, තද සුළං තත්ත්වය හමුවේ ගිනිදැල් මහා මාර්ගය හරහා ද පැතිර ගිය බවයි වාර්තා වන්නේ.

මේ වනවිට ප්‍රාන්තයේ ගිනිකොනදිග ප්‍රදේශයේ ලැව්ගිනි 78ක් පමණ සක්‍රීයව පවතින අතර, ප්‍රදේශ රැසක උෂ්ණත්වය සෙල්සියස් අංශක 34ත් 36ත් අතර ඉහළ අගයක පවතිනවා.

මෙය වසර 7කට පසු සැප්තැම්බර් මාසයකදී වාර්තා වූ ඉහළම උෂ්ණත්වය ලෙස සටහන් වන අතර, පවතින වියලි කාලගුණය ගිනි නිවීමේ කටයුතුවලට දැඩි බාධාවක් වී තිබෙනවා.

කෙසේ වෙතත් මේ වන විට මහා මාර්ගයේ ගමනාගමනය යළි ආරම්භ කර ඇති නමුත්, ඉදිරි දින කිහිපය තුළ ද මෙම ගිනි තත්ත්වය සක්‍රීයව පැවතිය හැකි බැවින් ප්‍රදේශවාසීන්ට අවධානයෙන් පසුවන ලෙසයි දැනුම් දී ඇත්තේ.