තායිලන්තයට ඇතුළුවීමේදී ශ්‍රී ලාංකිකයින්ට මෙතෙක් ලබාදී තිබූ වීසා රහිතව ඇතුළුවීමේ පහසුකම අහෝසි කිරීමට තායිලන්ත තානාපති කාර්යාලය තීරණය කර තිබෙනවා.

ඒ අනුව සැප්තැම්බර් 15 වැනිදායින් පසුව තායිලන්තය බලා පිටත්වීමට බලාපොරොත්තු වන සියලුම ශ්‍රී ලාංකිකයින් ගමනට පෙර අනිවාර්යයෙන්ම වීසා බලපත්‍රයක් ලබාගත යුතු බව සඳහන්.

වීසා අයදුම් කිරීම සිදු කළ යුත්තේ තායිලන්තයේ නිල e-Visa පද්ධතිය හරහා අන්තර්ජාලයෙන් පමණයි.

තානාපති කාර්යාලයට පැමිණ වීසා අයදුම්පත් භාරදීමේ ක්‍රමයද අත්හිටුවා තිබෙනවා.

සාමාන්‍ය සංචාරක වීසා අයදුම්පතක්, අවශ්‍ය සියලු ලේඛන නිවැරදිව සපයා ඇත්නම්, ක්‍රියාවලියට දින 3ත් 7ත් අතර කාලයක් ගතවිය හැකියි.

කෙසේ වෙතත් Non-Immigrant Visa, DTV වැනි අනෙකුත් වීසා කාණ්ඩ සඳහා සහ ශ්‍රී ලංකාවේ හෝ මාලදිවයිනේ පදිංචි විදේශිකයන්ගේ අයදුම්පත් සඳහා වැඩි කාලයක් ගතවිය හැකි බවත් තානාපති කාර්යාලය සඳහන් කර තිබෙනවා.

එමෙන්ම අවශ්‍යතාව අනුව අමතර ලේඛන ඉල්ලා සිටීමට හෝ අයදුම්කරුවන් සම්මුඛ පරීක්ෂණයකට කැඳවීමට තානාපති කාර්යාලයට බලය තිබෙනවා.

තායිලන්තයට සංචාරයක් සැලසුම් කරගෙන සිටිනවා නම්, අවසන් මොහොත දක්වා නොසිට e-Visa සඳහා කල්තියා අයදුම් කරන ලෙස දැනුම් දී තිබෙනවා.