ඩැන්ඩිනොං ප්‍රදේශයේ පදිංචිව සිටි 53 හැවිරිදි දෙදරු මවක් වන ඊවා ලස්රිනි ඝාතනය කළ බව ඇගෙන් වෙන්ව සිටි සැමියා අධිකරණය හමුවේ පිළිගෙන තිබෙනවා.

68 හැවිරිදි ඇලන් කීස් අද මෙල්බන් මහේස්ත්‍රාත් අධිකරණය හමුවට රක්ෂිත බන්ධනාගාරයේ සිට වීඩියෝ තාක්ෂණය ඔස්සේ ඉදිරිපත් කරනු ලැබුවා.

අප්‍රේල් පළමු වැනිදා ලිට්ල් රිවර් ප්‍රදේශයේදී ඊවා ඝාතනය කළ බවට එල්ල වූ චෝදනාවට ඔහු වරද පිළිගෙන තිබෙනවා.

ඉන්දුනීසියාවේ ජීවත් වන සිය දියණියන් දෙදෙනා හමුවීමට ඊවා ගුවන් ගමනක් යෑමට සූදානමින් සිට තිබුණා.

බලාපොරොත්තු වූ පරිදි ඇය පවුලේ සාමාජිකයන් සමඟ සම්බන්ධ නොවීම හේතුවෙන් දියණියන් ඇය අතුරුදන්ව ඇති බව බලධාරීන්ට දැනුම් දී තිබෙනවා.

අප්‍රේල් තුන්වැනිදා විදේශගත වීමට උත්සාහ කරමින් සිටියදී ඇලන් කීස් මෙල්බන් ගුවන්තොටුපොළේදී පොලීසිය අත්අඩංගුවට ගත්තා.

ඊට පසුදින ඊවාගේ සිරුර ලිට්ල් රිවර් මාර්ගය සහ ප්‍රින්සස් අධිවේගී මාර්ගය ආසන්නයෙන් සොයාගනු ලැබුවා.

දියණියන් දෙදෙනා වෙනුවෙන් කැපවූ මවක් වූ ඊවා, ඔස්ට්‍රේලියාවේදී ඉංග්‍රීසි ඉගෙන ගනිමින් තම ජීවිතය නැවත ගොඩනඟා ගැනීමට උත්සාහ කළ කාන්තාවක් බව මිතුරන් පවසනවා.

ඇලන් කීස්ගේ නඩුව සැප්තැම්බර් 28 වැනිදා වික්ටෝරියා ශ්‍රේෂ්ඨාධිකරණය හමුවේ යළි කැඳවීමට නියමිතයි.