වික්ටෝරියා ප්‍රාන්තය තුළ නීති විරෝධී ලෙස දුම්කොළ නිෂ්පාදන අලෙවි කරන වෙළඳසැල් අද දිනයේ සිට වහාම ක්‍රියාත්මක වන පරිදි වසා දැමීමට පොලිසියට සහ පරීක්ෂකවරුන්ට බලතල පවරමින් අලුත් නීතියක් බලාත්මක කර තිබෙනවා.

මෙම නව නීති යටතේ නීති විරෝධී දුම්කොළ අලෙවි කරන වෙළඳසැල් මුලින් දින 90ක කාලයකට වසා දැමිය හැකි අතර, අධිකරණ ක්‍රියාමාර්ග ඔස්සේ ඒවා දීර්ඝ කාලීනව වසා දැමීමට ද බලධාරීන්ට හැකියාව පවතිනවා.

නීතිය කඩකරන වෙළඳසැල්වල නාමලේඛනය Tobacco Licensing Victoria’s website එකේ ප්‍රසිද්ධ කිරීමටයි පියවර ගෙන ඇත්තේ.

මෙම නියෝග නොසලකා හරින වෙළඳසැල් හිමියන්ට ඩොලර් මිලියන 2.5ක් දක්වා දැවැන්ත දඩ මුදල් සහ වසර 20ක සිරදඬුවම් පැමිණවිය හැකි බව වික්ටෝරියා ප්‍රාන්ත බලධාරීන් අවධාරණය කරනවා.

කෙසේ වෙතත්, නීති විරෝධී දුම්කොළ ජාවාරම මර්දනය කිරීම සඳහා දුම්වැටි මත පනවා ඇති අධික බදු මුදල් අඩු කළ යුතු බවයි විපක්ෂ දේශපාලන කණ්ඩායම් යෝජනා කරන්නේ.

එහෙත් වික්ටෝරියා රජය ප්‍රකාශ කරන්නේ මහජන සෞඛ්‍යාරක්ෂාව උදෙසා එම බදු අඩු කිරීම් සිදු නොකරන බවයි.