හෘදයාබාධයකින් දිවි ගලවාගත් පුද්ගලයන්ගේ දිගුකාලීන සෞඛ්‍යය වැඩිදියුණු කිරීම සඳහා ලොව පළමු විශේෂිත පර්යේෂණ මධ්‍යස්ථානය ඔස්ට්‍රේලියාවේ පිහිටුවීමට තීරණය කර තිබෙනවා.

Bond Universityහි පිහිටුවන මෙම මධ්‍යස්ථානය Heart Disease Survivorship Research Centre ලෙසයි නම්කර ඇත්තේ.

මේ සඳහා ඔස්ට්‍රේලියානු ජාතික සෞඛ්‍ය හා වෛද්‍ය පර්යේෂණ සභාවෙන් ඩොලර් මිලියන 3ක අරමුදලක් ලබාදී ඇති බවයි විශ්වවිද්‍යාලය නිවේදනය කළේ.

හෘදයාබාධයකින් පසු සුවය ලැබූ බව පෙනුණත්, එවැනි පුද්ගලයෙකුට නැවත හෘදයාබාධයක් ඇතිවීමේ අවදානම දස ගුණයකින් වැඩි බව පර්යේෂකයන් අනතුරු අඟවනවා.

මානසික අවපීඩනය, බිය, ඖෂධවල අතුරු ප්‍රතිඵල සහ දිගුකාලීන සෞඛ්‍ය ගැටලු රැසකටද ඔවුන් මුහුණදිය හැකියි.

දැනට ලබාදෙන සති අටක හෘද පුනරුත්ථාපන වැඩසටහන් රෝගීන්ගේ ජීවිත කාලය පුරා පවතින අවශ්‍යතා සපුරාලීමට ප්‍රමාණවත් නොවන බව පර්යේෂකයන් පෙන්වා දෙනවා.

ඒ අනුව රෝහලෙන් පිටවීමෙන් පසුවත් රෝගීන්ට අවශ්‍ය ප්‍රතිකාර, මානසික සහාය සහ ජීවන රටා උපදේශන ලබාදිය හැකි නව ක්‍රම මෙම මධ්‍යස්ථානයෙන් අධ්‍යයනය කිරීමට නියමිතයි.

හෘදයාබාධවලින් දිවි ගලවාගත් පුද්ගලයන්ගේ අත්දැකීම්ද සෘජුවම මෙම පර්යේෂණ සඳහා යොදාගැනෙනවා.

මෙහි අවසාන අරමුණ හෘදයාබාධයකින් ජීවිතය බේරාගැනීම පමණක් නොව, ඉන්පසුව සෞඛ්‍ය සම්පන්න සහ ගුණාත්මක ජීවිතයක් ගත කිරීමට රෝගීන්ට අවස්ථාව ලබාදීමයි.

source – Bond University නිල වාර්තාව