දරුවන්ගේ ආත්මවිශ්වාසය වැඩි කිරීමට දෙමාපියන් සහ ගුරුවරුන් නිතර භාවිත කරන “ඔයා හරිම දක්ෂයි” යන වචන අනපේක්ෂිත අහිතකර ප්‍රතිඵල ඇති කළ හැකි බව නව පර්යේෂණයකින් අනාවරණ වී තිබෙනවා.

අවුරුදු පහත් හයත් අතර දරුවන් 210 දෙනෙකු යොදාගෙන චීනයේදී සිදුකළ පරීක්ෂණ දෙකකින් මෙම තොරතුරු හෙළිවුණා.

පළමු කාර්යය සාර්ථකව නිම කළ දරුවන්ට ඔවුන්ගේ දක්ෂතාව, උත්සාහය, වාසනාව හෝ ප්‍රශ්න පහසු වීම සාර්ථකත්වයට හේතුවූ බව වෙන වෙනම පවසා තිබෙනවා.

ඉන්පසුව වැඩිහිටියෙකු නොමැති අවස්ථාවක පිළිතුරු බලා වංචා කිරීමට අවස්ථාව තිබූ තවත් පරීක්ෂණයක් දරුවන්ට ලබාදී තිබුණා.

“ඔයා දක්ෂයි” යැයි අගය කළ දරුවන්ගෙන් 64.3%ක් එහිදී වංචා කර ඇති අතර, උත්සාහය අගය කළ දරුවන් අතර එය 35.7%ක් පමණයි.

වාසනාව නිසා ජයගත් බව පැවසූ දරුවන්ගෙන් 38.1%ක් සහ ප්‍රශ්න පහසු බව පැවසූ දරුවන්ගෙන් 21.4%ක් වංචා කර තිබෙනවා.

“දක්ෂ දරුවෙකු” ලෙස දිගටම පෙනී සිටීමට ඇතිවන මානසික පීඩනය නිසා දරුවන් තම ප්‍රතිරූපය රැකගැනීමට වංචා කිරීමට පෙළඹිය හැකි බව පර්යේෂකයන් පෙන්වා දෙනවා.

ඒ නිසා දරුවාගේ බුද්ධිය පිළිබඳ පොදු ලේබලයක් ලබාදීමට වඩා, ඔහු දැරූ උත්සාහය සහ අවංක හැසිරීම අගය කිරීම වඩාත් සුදුසු බව University of Wollongong අධ්‍යාපන විශේෂඥයන් සඳහන් කරනවා.

කෙසේ වෙතත්, පර්යේෂණය චීනයේ නාගරික මධ්‍යම පන්තික පවුල්වල කුඩා දරුවන් පමණක් යොදාගෙන සිදුකර ඇති බැවින් ප්‍රතිඵල සියලුම දරුවන්ට එකසේ අදාළ බව තවමත් තහවුරු කර නැහැ.

Source – University of Wollongong වාර්තාව