ඉදිකිරීම් ක්ෂේත්‍රයේ දැනටමත් පළපුරුද්ද තිබුණත් නිල වෘත්තීය සුදුසුකමක් නොමැති ඔස්ට්‍රේලියාසේවකයන් සඳහා වැදගත් අවස්ථාවක් උදා වී තිබෙනවා.

ඔස්ට්‍රේලියානු රජය ඩොලර් මිලියන 78ක් ආයෝජනය කරමින් නව වැඩසටහනක් ආරම්භ කර ඇති අතර, ඒ හරහා ඉදිකිරීම් ක්ෂේත්‍රයේ පළපුරුදු සේවකයන් 6,000ක් දක්වා ජාතික වශයෙන් පිළිගත් වෘත්තීය සුදුසුකම් ලබාගැනීමට අවස්ථාව හිමිවනවා.

මෙහි විශේෂත්වය වන්නේ කාර්මිකයන් සතුව දැනටමත් තිබෙන දැනුම සහ පළපුරුද්ද මුලින්ම ඇගයීමට ලක් කිරීමයි.

ඒ නිසා දැනටමත් ප්‍රගුණ කර ඇති කුසලතා නැවත මුල සිට ඉගෙන ගැනීමට අවශ්‍ය නොවන අතර, අඩුපාඩු ඇති කොටස් සඳහා පමණක් අමතර පුහුණුව ලබාදී වෘත්තීය සුදුසුකම සම්පූර්ණ කිරීමට අවස්ථාව ලබාදෙනවා.

වඩු කර්මාන්තය / ඉදිකිරීම් කටයුතු / බර යන්ත්‍ර හා දොඹකර මෙහෙයුම් /ටයිල් ඇල්ලීම / මිනුම් කටයුතු / ඉදිකිරීම් සැලසුම් සහ ස්ථාන කළමනාකරණය වැනි ක්ෂේත්‍රවල සේවය කරන පළපුරුදු කාර්මිකයන්ට මෙය වැදගත් අවස්ථාවක් වනවා.

අවම වශයෙන් වසර 3ක පළපුරුද්දක් ඇති ඉදිකිරීම් ක්ෂේත්‍රයේ සේවකයන් සඳහා මෙම වැඩසටහන සඳහා අයදුම්කල හැකියි.

පළපුරුද්ද අනුව අවශ්‍ය පුහුණුව පමණක් ලබාදීම නිසා, සාමාන්‍ය පුහුණු ක්‍රමයකට වඩා කෙටි කාලයකින් සුදුසුකම සම්පූර්ණ කරගැනීමට අවස්ථාව හිමිවීම විශේෂත්වයක්.

මෙම වැඩසටහන වසර තුනක කාලයක් ක්‍රියාත්මක කිරීමට නියමිත අතර, 2026 වසරේ අවසාන භාගයේ සිට ලියාපදිංචි කිරීම් ආරම්භ කිරීමට නියමිතයි.