වික්ටෝරියා ප්‍රාන්තයේ ප්‍රධාන යටිතල පහසුකම් සහ ඉදිකිරීම් ක්ෂේත්‍රයේ සිදුවන අක්‍රමිකතා සහ සංවිධානාත්මක අපරාධ පිළිබඳව විමර්ශනය කරන රාජකීය කොමිෂන් සභාවට (Royal Commission) තවත් බලතල රැසක් ලබාදීමට Carroll ලේබර් රජය පියවර ගෙන තිබෙනවා.

මේ සඳහා වන විශේෂ සංශෝධිත පනතක් (Inquiries Amendment Bill 2026) මෙම සතියේදී පාර්ලිමේන්තුවට ඉදිරිපත් කිරීමට නියමිතයි.

රාජකීය කොමිෂන් සභාවකට සෘජුවම පුද්ගලයින්ට එරෙහිව නඩු පැවරීමේ බලයක් නොමැති බැවින්, හෙළිවන අක්‍රමිකතාවලට එරෙහිව නීතිය ක්‍රියාත්මක කිරීම සඳහා වික්ටෝරියා ප්‍රාන්තයේ ප්‍රථම “විශේෂ රජයේ නීතිඥ කාර්යාලය” (Office of the Special Prosecutor) පිහිටුවීමට මෙමගින් යෝජනා කර තිබෙනවා.

මෙහිදී අදාළ විශේෂ රජයේ නීතිඥවරයාට කොමිසමෙන් හෙළිවන සාක්ෂි වික්ටෝරියා පොලිසිය, IBAC ආයතනය සහ අනෙකුත් අදාළ බලධාරීන් වෙත යොමු කරමින් වැරදිකරුවන්ට එරෙහිව නීතිමය පියවර ගැනීමේ පූර්ණ බලතල හිමිවනු ඇති.

මීට අමතරව, පරීක්ෂණ සභා විභාගවලින් පරිබාහිරව ඕනෑම පුද්ගලයෙකුගෙන් ප්‍රශ්න කිරීමටත්, ලිඛිත ප්‍රකාශ ලබා ගැනීමටත් රාජකීය කොමිෂන් සභාවට නව බලතල හිමිවනවා.

ලිඛිත ලේඛන නොමැති බව පවසමින් විමර්ශන මගහැරීමට කිසිවෙකුටත් අවස්ථාව නොලැබෙන අතර, මෙම නියෝග කඩකරන පුද්ගලයින්ට එරෙහිව දැඩි දඬුවම් පැමිණවීමට ද නියමිතයි.

මේ අතර අග්‍රාමාත්‍ය Ben Carroll සඳහන් කළේ ඉදිකිරීම් ක්ෂේත්‍රයට සංවිධානාත්මක අපරාධකරුවන් පැමිණි ආකාරය සහ ඊට වගකිව යුත්තන් කවුරුන්ද යන්න පිළිබඳ සත්‍යය දැනගැනීමේ අයිතිය වික්ටෝරියානු ජනතාවට ඇති බවයි.