ඔස්ට්‍රේලියානු රජය විසින් Working Holiday Visas සීමා කිරීමට සූදානම් වීම හමුවේ Queensland ප්‍රාන්තයේ සංචාරක කර්මාන්තය දැඩි අර්බුදයකට ලක්වීමේ අවදානමක් මතුව තිබෙනවා.

විදේශිකයින් රට තුළට පැමිණීම පාලනය කිරීම සඳහා වීසා වලංගු කාලසීමාව මාස 12 සිට මාස 6 දක්වා අඩුකිරීමට සහ දෙවන හා 3 වන වසර සඳහා ලබාදෙන දීර්ඝ කිරීම් අත්හිටුවීමටයි ඔස්ට්‍රේලියානු රජයේ අවධානය යොමුව ඇත්තේ.

කෙසේ වෙතත්, ක්වීන්ස්ලන්ඩ් සංචාරක කර්මාන්ත මණ්ඩලය (QTIC) පෙන්වා දෙන්නේ මෙම තීරණය හේතුවෙන් සංචාරක ක්ෂේත්‍රයේ දැවැන්ත සේවක හිඟයක් නිර්මාණය විය හැකි බවයි.

මේ අතර ඇතැම් ප්‍රාදේශීය සංචාරක ව්‍යාපාර සතියකට දින දෙකකට පමණක් සීමා කිරීමට සිදුවන බවට ද අනතුරු ඇඟවෙනවා.

පසුගිය වසරේදී පමණක් මෙම වීසා හිමියන් ඔස්ට්‍රේලියාව තුළ ඩොලර් බිලියන 4.4 කට අධික මුදලක් සංචාරය සහ වෙනත් සේවාවන් සඳහා වැයකර තිබෙනවා.

හෝටල්, ආපනශාලා සහ සංචාරක ස්ථාන පවත්වාගෙන යාම සඳහා මෙම ශ්‍රම බලකාය අත්‍යවශ්‍ය බැවින්, රජයේ මෙම තීරණය හේතුවෙන් ක්වීන්ස්ලන්ඩ්හි සංචාරක ආදායම මෙන්ම ආයෝජන ද දැඩි පසුබෑමකට ලක්විය හැකි බවයි ව්‍යාපාරිකයින් පෙන්වා දෙන්නේ.