ඔස්ට්‍රේලියාවේ පොලී අනුපාත නැවතත් ඉහළ යාමේ අවදානමක් ගැන සංචිත බැංකුව (RBA) විසින් දැඩි රතු එළියක් නිකුත් කර තිබෙනවා.

උද්ධමනය පාලනය කිරීමට අපොහොසත් වුවහොත්, මෙම වසර ඇතුළත තවත් පොලී අනුපාත ඉහළ නැංවීමකට (Rate Hike) යාමට සිදුවන බවයි RBA assistant governor Sarah Hunter ප්‍රකාශ කළේ.

සංචිත බැංකුව මේ වන විටත් මෙම වසර තුළ 3 වරක් පොලී අනුපාත ඉහළ දමා ඇති අතර, වත්මන් නිල පොලී අනුපාතය 4.35% ක් ලෙස පවතිනවා.

ජූලි මාසයේදී උද්ධමනය 3.5% දක්වා මඳක් පහත වැටුණද, එය අපේක්ෂිත මට්ටමට වඩා ඉහළ ප්‍රතිශතයක පැවතීම මෙම දැඩි තීරණයට හේතු වී තිබෙනවා.

සංචිත බැංකුවේ ඉලක්කය උද්ධමනය 2% ත් 3%ත් අතර මට්ටමක පවත්වා ගැනීම වන නමුත් නිවාස පිරිවැය ඉහළ යාම, පිටතින් ලබාගන්නා ආහාර පාන මිල ගණන් වැඩිවීම සහ මැදපෙරදිග අර්බුදය හමුවේ ලෝක වෙළඳපොලේ තෙල් මිල ඉහළ යාම නිසා උද්ධමනය තවදුරටත් ඉහළ මට්ටමක පවතිනවා.

එබැවින් ANZ, CBA, සහ Westpac යන ප්‍රධාන බැංකු පුරෝකථනය කරන්නේ ලබන නොවැම්බර් මාසයේදී සංචිත බැංකුව විසින් නැවතත් පොලී අනුපාත ඉහළ දමනු ඇති බවයි.

කෙසේ වෙතත්, සැප්තැම්බර් 29 වනදා පැවැත්වෙන ඉදිරි රැස්වීමේදීම මෙම වැඩිවීම සිදුවිය හැකි බවයි NAB බැංකුව පවසන්නේ.

මේ අතර බැංකු ක්ෂේත්‍රයේ ආර්ථික විද්‍යාඥයින් පෙන්වා දෙන්නේ ජනතාවට පොලී අනුපාත පහත වැටීමේ සැබෑ සහනයක් හිමිවීමට නම් 2027 වසරේ අගභාගය දක්වා බලා සිටීමට සිදුවනු ඇති බවයි.