මුහුදු මට්ටම ඉහළ යාම හේතුවෙන් 2100 වන විට ඔස්ට්‍රේලියාවට ඩොලර් බිලියන 855කට වැඩි ආර්ථික හානියක් සිදුවිය හැකි බව නව පර්යේෂණයකින් අනාවරණ වී තිබෙනවා.

Climate Council සහ University of Melbourne පර්යේෂකයන් සිදු කළ මෙම අධ්‍යයනයට අනුව, සියවස අවසන් වන විට වෙරළබඩ ප්‍රදේශවල පිහිටි දේපළ 267,000කට වැඩි සංඛ්‍යාවක් ගංවතුර අවදානමට ලක්විය හැකියි.

එමෙන්ම ඔස්ට්‍රේලියාව පුරා හෙක්ටයාර් මිලියන 2කට ආසන්න භූමි ප්‍රමාණයකටද ගංවතුර බලපෑම් ඇතිවිය හැකි අතර, එයින් විශාල කොටසක් කෘෂිකාර්මික ඉඩම් බව පර්යේෂකයන් පෙන්වා දෙනවා.

විශේෂයෙන් Queensland, New South Wales සහ Western Australia ප්‍රාන්තවල දේපළ විශාල සංඛ්‍යාවක් අවදානමට ලක්වන අතර, Melbourne ද ඉහළ අවදානමක් ඇති ප්‍රධාන නගරයක් ලෙස හඳුනාගෙන තිබෙනවා.

Melbourne නගරයේ Docklands, Southbank සහ Yarra River ආශ්‍රිත පහත් බිම් ප්‍රදේශවලට මේ බලපෑම වැඩි විය හැකි අතර, Melbourne ප්‍රදේශයට පමණක් ඩොලර් බිලියන 20කට වැඩි ආර්ථික හානියක් සිදුවිය හැකි බවයි වාර්තාව සඳහන් කරන්නේ.

පර්යේෂකයන් පෙන්වා දෙන්නේ මුහුදු මට්ටම ඉහළ යාමෙන් නිවාස සහ යටිතල පහසුකම්වලට පමණක් නොව, කෘෂිකර්මාන්තයට සහ ආහාර සැපයුමටද දිගුකාලීන බලපෑමක් එල්ල විය හැකි බවයි.

ඒ අනුව ඉදිරියේදී අවදානම් ප්‍රදේශ හඳුනාගෙන නිසි සැලසුම් සකස් කිරීම, ගංවතුර අවදානම් ප්‍රදේශවල නව ඉදිකිරීම් සීමා කිරීම සහ දේශගුණික බලපෑම් අවම කිරීමට කඩිනම් පියවර ගැනීම අත්‍යවශ්‍ය බව විශේෂඥයන් අවධාරණය කරනවා.