වික්ටෝරියාවේ බරපතළ තරුණ අපරාධවල වින්දිතයන්ට, එම අපරාධවලට වරදකරුවන් වූ තරුණයන් සිරගතව සිට නිදහස් වීමට නියමිත අවස්ථාව පිළිබඳ දැනුම්දීමක් ලබාදීමට නව ක්‍රමවේදයක් හඳුන්වා දීමට නියමිතයි.

සැප්තැම්බර් 30 වනදා සිට ක්‍රියාත්මක වන මෙම ක්‍රමවේදය යටතේ, සුදුසුකම් ලබන වින්දිතයන්ට ලියාපදිංචි වී වරදකරුවන්ගේ නිදහස්වීම සහ ඇප මත නිදහස් කිරීම සම්බන්ධ තොරතුරු ලබාගැනීමට හැකියාව ලැබෙනවා.

මිනීමැරුම්, ස්ත්‍රී දූෂණ, නිවාසවලට බලහත්කාරයෙන් ඇතුළුවීම, වාහන පැහැරගැනීම් සහ බරපතළ ලිංගික අපරාධ ඇතුළු බරපතළ අපරාධවල වින්දිතයන්ට මෙම ක්‍රමවේදය අදාළ වනවා.

මෙතෙක් වික්ටෝරියා ප්‍රාන්තයේ තරුණ අපරාධවල වින්දිතයන්ට වරදකරුවන් නිදහස් වන අවස්ථාව පිළිබඳ දැනුම්දීම සඳහා විධිමත් ලියාපදිංචි ක්‍රමවේදයක් නොතිබූ අතර, එවැනි ක්‍රමවේදයක් නොතිබූ එකම ප්‍රාන්තය හෝ ප්‍රදේශය ලෙස වික්ටෝරියා සැලකුණා.

නව වෙනස්කම් යටතේ තරුණ වරදකරුවන්ගේ ඇප සම්බන්ධ තීරණ ගැනීමේදී වින්දිතයන් සහ ඔවුන්ගේ පවුල්වල අදහස්වලට වැඩි අවධානයක් යොමු කිරීමටද නියමිතයි.

කෙසේ වෙතත්, මෙම නව ක්‍රමවේදය අතීතයේ සිදුවූ අපරාධ සඳහා පසුගාමීව අදාළ නොවන බැවින්, දැනටමත් වරදකරුවන් කර ඇති ඇතැම් තරුණයන්ගේ වින්දිතයන්ට මෙම දැනුම්දීමේ පහසුකම හිමි නොවන බවද සඳහන්.

වින්දිතයන්ගේ ආරක්ෂාව සහ ඔවුන්ගේ අදහස් යුක්තිය පසිඳලීමේ ක්‍රියාවලියේදී වඩාත් වැදගත් කිරීම මෙම වෙනස්කම්වල අරමුණ බව වික්ටෝරියා රජය පවසනවා.