විදේශ රටවල දැඩි පරිශ්‍රමයකින් යුතුව සේවය කරමින් රටට ඩොලර් එවන ශ්‍රී ලාංකිකයන්ගේ තමන්ගේම නිවසක් පිලිබඳ සිහිනය සැබෑ කරලීම සඳහා ‘එතෙර දිරිය’ (Ethera Diriya) නමින් විශේෂ නිවාස ණය යෝජනා ක්‍රමයක් හඳුන්වා දී තිබෙනවා.

මෙම වැඩසටහන අද සිට නිල වශයෙන් ක්‍රියාත්මක කිරීමට නියමිතයි.

මෙම ණය යෝජනා ක්‍රමය යටතේ රුපියල් 500,000 සිට උපරිම රුපියල් 10,000,000 (කෝටියක්) දක්වා වූ ණය මුදලක් වසර 10ක උපරිම ආපසු ගෙවීමේ කාල සීමාවක් යටතේ ලබා ගැනීමට අවස්ථාව සලසා දී තිබෙනවා.

ඊට සහභාගී වන රාජ්‍ය හා පෞද්ගලික බැංකු හරහා අදාළ මූල්‍ය පහසුකම් සැපයෙන අතර, මෙහි ඇති විශේෂම වාසිය වන්නේ සාමාන්‍ය ණය ක්‍රමයක මෙන් මුළු පොලියම ගෙවීමට සිදු නොවීමයි.

ශ්‍රී ලංකා විදේශ සේවා නියුක්ති කාර්යාංශය (SLBFE) විසින් මෙම ණය මුදල සඳහා අදාළ පොලී වියදමේ නිශ්චිත කොටසකට සහනාධාරයක් ලබාදීමට නියමිතයි.

කෙසේ වෙතත්, මෙය රජයෙන් නොමිලේ ලබාදෙන මුදලක් නොවන අතර, බැංකු හරහා ලබාගෙන නැවත ගෙවිය යුතු ණය මුදලක් වනවා.

එසේම උපරිම සීමාව කෝටියක් වුවද, සෑම අයදුම්කරුවෙකුටම එම මුදල ස්වයංක්‍රීයව නොලැබෙන අතර, විදේශීය ආදායම සහ ණය ආපසු ගෙවීමේ හැකියාව ඇතුළු බැංකු නිර්ණායක මත එය තීරණය වනු ඇති.

මේ අතර වැඩසටහනට අදාළව නිකුත් වීමට නියමිත ඉදිරි නිල කොන්දේසි සහ බැංකු ලැයිස්තුව හරහා අයදුම්කරුවන්ට වැඩිදුර තොරතුරු ලබාගත හැකියි.